Tuikual South tan chak loh a thiang lo

Mizoram Super League final game 2 chu zanin dar 7:30 hian khelh a ni dawn a, match hmasa zawka chak lo Tuikual South tan chak loh nawn a thiang lo. Tuikual hi an tlawm leh a nih chuan a zawna a vawi hnih nan Zarkawt BCA an champion dawn.

Phengphehlep fans lamin an team liam mai tur auh phur an tum dawn avangin Hawla Indoor Stadium-ah an kal hnem dawn a, champion lawm tumin Zarkawt BCA fans pawh an pungkhawm hnem ang. TKS hian hnehna an chang let thei a nih chuan December 14, Zirtawpni zanah game 3 khelh tur a ni ang.

Comeback?
Tuikual South hian league round lama an hneh loh Khatla TBL chu semifinal-ah an hneh let thei a, hei vang hian final game-1 an hneh loh Zarkawt BCA lakah pawh hnehna chan let theih an inbeisei.

TKS manager Lalremsiama Hrahsel chuan, "Tihsual kan ngah a, tun hma pawhin kan insiamṭha thei tawh. Tun ṭumah pawh insiam ṭhat theih ngei ka beisei," tiin Vanglaini a hrilh a, chak loh nawn an tum lo.

Final game 1-ah Desmond Antwine Medder-a'n point 46 ngawt nei mah se a ṭhiante puihna a dawng ṭha tawk lo. Assistant coach R. Liansangpuia'n eng tiang takin nge Desmond-a thlawp turin a tualchhung player-te a chhawr ang tih chu hmuh châkawm tak a ni.

Tlang a ngai
Zarkawt BCA coach Lalruatfela chuan, "Game 3 khelh ngai lo tura tlang nghal kan tum," tiin Vanglaini a hrilh a, season hmasa final ang bawkin game hmasa pahnihah Tuikual South hneh nghal an tum.

An intawn hma saka hliam tuar Matthew Remtluanga Sailo a inlan thei dawn a, Lalrina Renthlei leh Zonunsanga te an neih bawk avangin hlauhthawn tur a awm lo ang. Basket venhim a ṭul huna hman theih Sowkin Shetty leh point mamawh huna chhawr theih Cameron Anderson an neih avangin an champion nghal a nih pawhin a mak lo ang.

Afela chuan, "Player tin tan match pumpui khelh a hahthlak a, hei vang hian a ṭha ho pawh an inkhelh chhawk a ngai ṭhin. Court chhungah panga chauh an awm thei a, zaninah pawh kan ṭhat dan ber turin an inluhchhawk leh ang," a ti.