Tih theih loh titu Spurs an tlang
Tottenham manager Mauricio Pochettino chuan Champions League last 16 an inpet kai thei chu 'tih theih loh ti' ang mai an nih thu a sawi. Group B aṭangin hmahruaitu Barcelona leh Spurs te an tlang a, Inter Milan chuan Europa League an khel zui thung ang.
Thawhlehni zan inkhelah Tottenham hian hun tawp dawnah an siphurh sutin Nou Camp-ah point khat an hlawh chhuak a, inkhel dangah Inter Milan chuan an mikhual PSV Eindhoven hneh zawh loh avangin point neih zat inangah Tottenham an chungnung a ni.
Vanneihna
Group match hmasa pathumah Tottenham-in point khat chiah an hmu thei a, an tan knock out stage luh beiseina a tawp zuia ngaih a ni. Mahse, Poch-a'n an beidawn loh thu a sawi hnuah PSV leh Inter an hneh a beiseina a nung thar.
Amaherawhchu, Spurs tan kawng a la awlsam mai lo. Match hnuhnung ber an khelhna tur hi Nou Camp a ni a, mikhual team tana lenluh châkawm lohna ber hmun pakhat a tling. Chutih rualin an khingpui hi group hmahruaitu an nih chian tawh avangin boruak rit lutuk a nep deuh.
Catalan club lamin player ṭha
ṭhenkhat an dah ṭha a, captain Lionel Messi bakah Gerard Pique leh Jordi Alba te pawh bench-ah dah a ni, heti chung hian an hlauhawm tho. Minute sarihna lekah Ousmane Dembele chuan Kyle Walker-Peters tlansanin box chhungah Harry Winks a bum zui leh a, keeper Hugo Lloris tana dan hman loh goal a khung.
Goal an phurh hmasak avangin Tottenham hi tla chianga ngaih an ni a, hetih laia an beiseina saimtu erawh inkhel dangah PSV chuan Inter lakah goal khatin hma an la hruai ve mek bawk chu a ni. Italian club hian minute 73-naah an si phurh an sut a, hetianga hun a tawp a nih chuan si phur mek Spurs an tla tho.
Poch-a nauten na takin an nawr let a, Harry Kane leh Son Heung-min te hlauhawm viau ṭhin mah se goal hmaah an 'bil' tlat. Liverpool midfielder hlui Philippe Coutinho-a'n goal ban a pet per dawp lai khan an thin phu a rnag zual hlein a rinawm.
Spurs lamin a tawpah an beidawn duh loh rah an seng, striker Kane-a'n box chhungah ball lalutin rang takin a cross thla a, defender ven kara rawn put chhuak Lucas Moura chuan an siphurh a sut. Nou Camp leh San Siro-ah goal a luh belh tawh lo a, vannei takin Spurs an tlang.
Hlawhtlinna
Tla tura ngaih an nih hnua tling leh thei Spurs manager Poch chuan, "Fans leh player-te chungah ka lawm, kan club tan chuan thil tawn ropui tak zinga chhiar tel tham a ni. Inter Milan inkhel result hre loin hun kan hmang a, hun harsa leh khirh tak chu vanneih thlak takin kan paltlang a ni," tiin a sawi.
Barcelona hian an keeper ṭha Marc-Andre ter Stegen aiah Jasper Cillessen an hmang a, Dutch keeper hian a tir lamah Moura, Son leh Christian Eriksen te goal khung tura ngaih a dan sak vek a, striker Kane-a tauh goal tur pawh Miranda-a'n line aṭangin a dan sak bawk.
Tottenham hian goal phurh belh huama an nawr hnuah an mamawh goal an sual chhuak a, English striker Kane-a'n huaisen taka ball a tlan pui ngam bakah mahni hmasial lo taka Moura a siamsak kha an tlang theih chhan pawimawh a tling.
Argentine manager Poch chuan, "Hun ṭha tam tak kan insiam theih avang khan tlang theih beiseina kha ka nei reng. Mahse, kan hlah hnem em avangin Barcelona khan an khung belh teuh hle, a khaikhawm nan chuan group harsa tak aṭanga kan tlang thei hi a lawmawm takzet," tiin a sawi.