Liverpool chhandam nan Salah & Alisson
Premier League hmahruaitu Liverpool-in Champions League last 16 lut tura an mamawh chu 1-0 a chak a ni a, an mamawh chhanna chu Mohamed Salah leh Alisson te an ni.
Liverpool hian Thawhlehni zan khan an mikhual Napoli chu 1-0 in an hneh a, goal awmchhhun hi Mohamed Salah khung a ni - hun tawp dawnah Alisson chuan goal ngei tura ngaih ṭha takin a dang bawk.
Alisson-a'n injury time-ah ṭha taka a dan avangin fak hlawh mah se Brazilian keeper chet ṭhat hi team pahnih inkhel hrilhfiah nan a tling tawk lo.
Minute 90 chhung Liverpool-in inkhel an thunun zawk a, Salah, Mane leh Virgil van Dijk te chuan 'clear chance' tia sawi theihah vek goal an khung thei lo!
A hming chu Salah
Liverpool an che ṭha chho a, Salah hming kan lam ngun leh dawn chauh niin a lang! Egyptian forward hian sawisel hlawh takin season bul a ṭan a, mah se tun hnaiah goal hmangin amah sawiseltute a chhanglet.
Hetichung hian team lian laka goal khung thei lo tiin sawisel a la ni cheu a, boruak sangah a team a chhanhim thei lo niin an sawi. Mahse, Thawhlehni zana Liverpool tana inlan Salah erawhin thawnthu dang min hrilh thung.
Minute 34-naah defender palian Kalidou Koulibaly ven karah tal chhuakin mual sir lam aṭangin a pet lut a, Anfield thawm chu ring tak a ni - Salah hian goalkeeper chauh a hmachhawn chungin a pet goal lo bawk.
Kum 26 mi forward hian tun season-ah match 23 khelin goal 13 a khung tling leh der tawh a, Liverpool-in Champions League leh Premier League nomawi chawi an tumna kawngah a ṭangkai chho zel dawn tih a lang.
Ban rinawm Alisson
Napoli-in Liverpool goalkeeper tan hna an siamsak meuh lo a, hnathawh tur a neihchhuan erawh pound maktaduai 66.8 man goalkeeper hian a hming chher nan a hmang.
Italian club hian injury time-ah, Liverpool tana thawhlehna hun awm tawh miah loah Arkadiusz Milik hmangin chance ṭha zet an nei a, mah se Polish striker hi a hun taka 'che' Alisson chuan a dang chat.
Liverpool boss Jurgen Klopp chuan, "Alisson hi hetiang tak hian a ṭha tih lo hria ila chu a man let kha amah lei nan ka hmang ngei ang," tiin Roma aṭanga an lak keeper a fak hle.
Reds tan tlarhnungah ṭum dang ang bawkin pound maktaduai 75 man Virgil van Dijk a khel ṭha takzet bawk a, Andrew Robertson hming lam hmaih a thiang lo bawk - season hmasaah Liverpool tlarhmain fak an hlawh a, tunah chuan tlarhnung pawh fak a ṭul tel ta.
Aw...Mane!
Liverpool tan tlarhmaa 'nung' tak Salah leh hun tawp dawna chhanhimtu Alisson ten fak an phu a, Thawhlehni zana Reds tana hun duhawm lo tak hmang erawh Sadio Mane a ni.
Senegalese forward hian goal khung ngeina tur nia ngaihah vawi thum ngawt chu goalkeeper chauh hmachhawn chungin a pet goal thei lo a, Alisson-a'n Liverpool bakah a mimal takin Mane-a chhanah a ngaih theih.
Liverpool boss Jurgen Klopp erawhin a naute an chet ṭhat miau avangin tumah a sawisel duh lo a, German coach chuan, "He team ka kaihhruai theih avanga ka inchhuanna aia inchhuanna nasa zawk hi a awm thei pawhin ka ring lo," a ti.
Paris Saint Germain an hneh loh ṭuma, "Tunah chuan Anfield puihna kan mamawh ta," titu hian, "Anfield kha a nungin a khat vel vek a ni," a ti a, Liverpool fans puihnaah lawmthu a sawi.
Chak nuamsa
Group C inkhel dangah Paris St Germain-in hnehna chang turin harsatna an tawk lo a, Red Star chu khualmualah 4-1 a sawpin group hmahruaitu nichungin last 16 an lut.
French club tan hian Edinson Cavani, Neymar, Marquinhos leh Kylian Mbappe ten goal khat ṭheuh an khung a, Serbian club tana Marko Gobeljic goal khung ve chu mualpho zualpui tur khuhna chauh a ni.
Liverpool-in pahnihna nichunga last 16 an luh avangin knockout round-ah mahni group hmahruaitute an tawng dawn tihna a ni a, he thu buatsaih a nih laia group hmahruaitu nichiang Real Madrid, Barcelona, Borussia Dortmund leh Portuguese champions Porto te chu knockout round-a an tawn theih tur an ni ang.
Team Dinhmun
Group A
Team Pld W D L GF GA GD Pts
Borussia Dortmund 6 4 1 1 10 2 8 13
Atlético Madrid 6 4 1 1 9 6 3 13
Club Brugge 6 1 3 2 6 5 1 6
Monaco 6 0 1 5 2 14 -12 1
Group B
Team Pld W D L GF GA GD Pts
Barcelona 6 4 2 0 14 5 9 14
Tottenham Hotspur 6 2 2 2 9 10 -1 8
Inter Milan 6 2 2 2 6 7 -1 8
PSV 6 0 2 4 6 13 -7 2
Group C
Team Pld W D L GF GA GD Pts
PSG 6 3 2 1 17 9 8 11
Liverpool 6 3 0 3 9 7 2 9
Napoli 6 2 3 1 7 5 2 9
Red Star Belgrade 6 1 1 4 5 17 -12 4
Group D
Team Pld W D L GF GA GD Pts
Porto 6 5 1 0 15 6 9 16
Schalke 04 6 3 2 1 6 4 2 11
Galatasaray 6 1 1 4 5 8 -3 4
Lokomotiv Moscow 6 1 0 5 4 12 -8 3
Inkhel Result
Galatasaray 2 - 3 Porto
Schalke 04 1 - 0 Lokomotiv Moscow
Club Brugge 0 - 0 Atlético Madrid
Monaco 0 - 2 Borussia Dortmund
Barcelona 1 - 1 Tottenham Hotspur
Inter Milan 1 - 1 PSV
Liverpool 1 - 0 Napoli
Red Star Belgrade 1 - 4 PSG