Asian Cup khel thei turin Mizo pali

India coach Stephen Constantine chuan 2019 AFC Asian Cup khel turin player 34 a ko chhin a, koh hmasak zingah hian Mizo tlangval Jeje Lalpekhlua, Jerry Lalrinzuala, Laruatthara leh Lallianzuala Chhangte te an tel.

January 6 aṭanga khelh ṭan tur Asian Cup atan hian player 34 hi enchhin phawt an ni ang a, December 20-ah player 28-in inelna neihna hmun tur UAE an pan ang.

UAE-ah hian player 23-ah an inthlifim leh dawn a, tuna koh chhin zing aṭang hian player 11 ngawt chu Asian Cup-a India aiawh tur hian an tel dawn lo tihna a ni.

ISL club zinga player thawh hnem ber Kerala Blasters chuan player panga an thawh a, Delhi Dynamos, Bengaluru, Chennaiyin, Pune City leh ATK ten player pali ṭheuh thawhin I League player zingah East Bengal tana khel Salam Ranjan Singh chu koh awmchhun a ni.

Mizo player zingah Jeje chu player 23 zingah pawh tel chiang tura ngaih a ni a, Hnahthial tlangval hnungzui turin Jerry, Ruatthara leh Lianzuala te tan ṭan a ngai khawp ang.

Asian Cup-ah hian India hi Group A-ah awmin Bahrain, UAE leh Thailand te nen an awmho a, an match hmasa ber chu January 6-ah Thailand nen an khel ang.