Zaninah Sub Junior Semifinal Mizoram Vs Arunachal Pradesh

National Sub Junior Football Championship semifinal-ah zanin 6:00 hian Mizoram leh inelna thlengtu Arunachal Pradesh te an inhmachhawn ang, inkhel dangah vawiin tlai dar 1:00 hian Odisha leh Jharkhand te an inkhel bawk ang.

Naharlagun, Arunachal Pradesh-ah Mizoram hi Goa, Haryana, Telegana leh Jharkhand te nen group khatah awmin hmahruaitu an ni a, an match hnuhnung berah Jharkhand nen hmahruaitu nih inchuhin 4-0 in an sawp.

Mizoram coach Van-lalrova chuan, "Eng nge a awmzia kan hrethiam chiah lo. Jharkhand khan Arunachal hmachhawn an hreh emaw ni chu le a tih theih a, inkhelah chuan kan hneh khawp mai. Keini erawhin champion kan duh a, match tina chak kan duh vek avangin chak tumin kan khel," tiin group match hnuhnung ber

chungchang a sawi.

Semifinal chungchang sawi zuiin Rova chuan, "Arunachal leh Odisha inkhel kan en a, an intluk tawk. Duh thlan tur ni ta se, tum châk zawk kan nei lo. Odisha 1-0 in an chak a, Arunachal-in penalty an hlah. Team ṭha tak ve ve an ni a, kan hneh theih erawh kan ring," tiin Vanglaini a hrilh.

Assistant manager Zorammuana chuan, "Team chhung kan inlung-rual a, Pathian chunga kan innghah a ngai. Mizo mipuite ṭawngṭaipuina kan dil takzet a ni," tiin a sawi.

Mizoram coach Rova hi tun hmaa Mizo Trio tiha an sawi lar zinga mi kha ni a, ani bakah hian F. Lalmuankima (manager) leh Zorammuana (asst manager) ten team hi an kaihruai a ni.