Arsenal leh Blues tan player dahṭhat hun
Europa League group match hnuhnung ber chu zanin hian khelh a ni dawn a, Premier League club ṭha Arsenal leh Chelsea te chu an group hmahruaitu an nih chian tawh avangin an player tawnhriat nei tlem zawk tan hun an siamsak tura ngaih a ni.
Gunners hian dar 1:30 hian Emirates Stadium-ah Qarabag an mikhual dawn a, Ajerbaijan club hi an group mawngphah luahtu an nih avangin beisei an nei tawh lo. Chelsea chu Vidi mualah an zin chhuak thung dawn a ni.
Emery naute
Unai Emery enkawl Arsenal hi inelna hrang hrangah a zawnin match 21 chhung hneh loh nei loin an kaltluang mek a, zaninah pawh chak tura rinkai an ni ang.
Gunners hian December thla chhungin Premier League match pathum khelh tur an la neih avangin player inkhek thiam a ngai dawn. Hliam vangin Mesut Ozil leh Aaron Ramsey te chu an inlan thei dawn lo tih a chiang a, defender Rob Holding tan season a tawp tawh bawk.
Huddersfield nen an inkhelh ṭumin Arsenal hian an captain Laurent Koscielny chu bench-ah an dah thei tawh, France international hlui hi tun season chhungin la inlan lo mah se zanin hi a tan hun ṭha hmasa a ni tura ngaih a ni ang.
League match an khelh leh hunah Shkodran Mustafi leh Sokratis Papastathopoulos te chu hrem vangin an inlan thei dawn lo a, hei vang hian season hmasa tawp lama inhliam Koscielny an mamawhna a sang chho dawn hle. Ani bakah hian keeper Petr Cech pawh rawlthar zawkte ho khawm turin a inlan tura ngaih a ni.
Sarri-a Blues
Europa League match nga an khelh tawhah Chelsea leh Eintracht Frankfurt te chiah chak kim thei awmchhun an ni a, bul an ṭan fuhna hi duhthusama ṭhain khar an duh ngei ang tih chu thil chiang a ni.
Amaherawhchu, Chelsea hian league an ngaihtuah tel a ngai. Europa League an match hmasa lamah player ṭha chhawr ṭhin mah se zaninah chuan an chhawr a rinawm loh. Manchester City hneh hlim hian player an siksawi nual a nih pawhin a mak hran lo ang.
Man City an hmachhawn ṭumin Alvaro Morata chu squad-ah telh a ni lo a, Spanish striker hi Vidi lakah a hman theih ang. Real Madrid hmatawng hlui a awm chuan Arsenal striker hlui Olivier Giroud chu chawlh tir a ni thung dawn.
Italian manager hnuaia rinrawl ni phak lo midfielder Cesc Fabregas bakah Ross Barkley te bul ṭan thei zingah an awm a, an first team player ṭhenkhat tel lo pawhin Chelsea hi team ṭha leh khawng tak an la ni dawn.
Keeper manto ber Kepa Arrizabalaga-a'n match hmasa lam khel vek mah se Willy Caballero tan hmun siamsak a nih rin a ni a, midfielder Mateo Kovacic a inhliam laiin David Luiz leh Jorginho te tan chawlhna hun ṭha a ni thung ang.