Silva a chawl rih dawn

Manchester City midfielder David Silva chu a malpui hliam vangin a chawlh rih a ngai dawn a, a chawlh chen tur chiang lo mah se Premier League match ṭhenkhat chu a khel thei dawn lo tih a chiang.

Kum 32 mi Silva hi Chelsea nen an inkhelh ṭumin a hliam a, hliam vang hian second half-ah thlak a ngai. Spain international hlui hi nizana Man City leh Hoffenheim ten Champions League an khelh ṭum pawhin a inlan thei lo nghal a ni.

A midfielder chungchang sawiin Pep Guardiola chuan, "Silva hi a la damlo, na tak chu ni lo mah se chawlh kar eng emaw ti chhung chu a chawlh a ngai dawn," a ti. City hian hliam vangin Kevin De Bruyne, Danilo, Sergio Aguero, Benjamin Mendy leh Claudio Bravo te pawh an chhawr thei lo mek.

Silva hi a dam a nih chuan Pep-a'n a chhawr rim berte zinga mi a ni, tun season Premier League match 16 an khelh tawh zingah vawi 14 inlanin; Champions League match ngaah a inlan kim vek bawk.

Man City hian December thla chhungin league match bikah Everton, Crystal Palace, Leicester City leh Southampton te an la hmachhawn dawn a, December 18 hian League Cup quarterfinal-ah Foxes nen an intawng bawk ang.