Chak nei loin Henry hote an tawp

UEFA Champions League group match hnuhnung berah Mo­naco chuan Boru­ssia Dortmund mikhualin 2-0 in an chak lo. Thier­ry Henry hote hian match ruk an khelhah Club Brugge nen an inhnehtawk tih loh chu an chak lo fai vek a, Bundesliga hma­hruaitu Dortmund erawh inkhel danga Atle­tico Madrid leh Club Brugge te goal awm loa an in­hneh­tawk a­vang­in hmahruaitu an ni.

A awlsam lo

Monaco-in Stade Louis II-a Dortmund an mikhual hma hian point khat chauh an hmuh avangin table mawgphah chhuahsan ngaihna a awm tawh lo a, Europe-a an zinkawng chu a tawp tawh. Chutihrualin season ṭha lo an hman mek tih ziaawm nan chak erawh a pawimawh thung.

Amaherawhchu Dortmund-in Raphael Guerreiro hmangin minute 15-na leh 88-naah goal an khung a, Monaco lamin a chhanletna an nei lo. German club hian an player pawimawh Marco Reus, Axel Witsel leh Jadon San­cho te an hruai tel lo a, chutichunga hnehna an chang avangin coach Lucien Favre a lawm khawp ang.

Monaco coach Thier­ry Henry chuan, "Champions League-ah hian kum hnih chhung chu chak hmel kan hmu ta lo. Tun ṭuma kan hmachhawn hi team ṭha tak an ni a, Bundesliga hma­hruaitu an nih bawk avangin a harsa. Chu­tih­rualin tum dang kan nei a, league lamah kan chet ṭhat a ṭul, tuna kan inkhel hi kartawpa Lyon nen kan inkhel tur atan inpuahchahna ṭha tak a ni thei ang," tiin a sawi.

Ligue 1-ah Monaco hi 19-naah an awm mek a, match 16 khelhah point 13 chiah hlawh chhuakin Champions League khel pha dang PSG nen an inthlauhna chu point 31 zet a ni.

Atletico an bil

Atletico Madrid-in Jan Breydel Stadium-ah Antoine Griezmann leh player pawimawh dang an hruai chungin Club Brugge lakah goal an khung thei lo.

Diego Simeone-a hoten head to head-ah Borussia Dortmund an tluk loh avangin Group A-ah pahnihnaah an awm phah a, knock­out stage-ah khing­pui harsa zawk hma­chhawn thei din­hmunah an ding. Round 16 tie draw hi Thawhṭanni tlaiah Nyon-ah pawh a ni ang.