Super Dan

Lin Dan-a'n inkhelh a chawlhsan thu a puan khan badminton infiamna ngainatuten an ui a, badminton chauh ni loin infiamna khawvel chuan player ropui bik a thlah liam chu a lo ni ta reng si. Ani ang ema badminton player ropui hi an la piang ngai lo a, an piang leh tawh kher lo thei bawk.

Infiamna khawvel, a bik takin mimal inelnaah chuan Olympic gold medal lak hi an thil tum sang leh duhthusam a ni ṭhin - Lin Dan chu 2008 Beijing leh 2012 London-ah te khan pakhatna a ni thei a, mipa badminton player zingah Olympic gold medal humhim thei awmchhun a ni.

Inelna ngaihhlut ‘Super Grand Slam’ tia an sawi ṭhin - Olympic, World Championship, World Cup, Thomas Cup, Sudirman Cup, Super Series Masters Finals, All England Open, Asian Game leh Asian Championship title la vek thei awmchhun a ni a, phat rual lohin midang chungah a leng.

Chinese hnam chi khat Hakka chhungkua aṭangin Lin Dan hi a lo piang, a nu leh pa Gao Xiuyu leh Lin Jianbin te chuan an fapa chu rimawi lama inhmang turin an duh. Naupangte a nih laiin 'piano' an zirtir - a puitlin hunah pianist ropui tak ni se tih chu an hmathlir pawh a ni ngei ang.

Mahse, rimawi chu Lin Dan bengah a mawi ber lo, kum nga mi a nih chuan badminton khelh a duh zawk a, a nu leh pa pawhin an fapa kawng tur chu dalsak loin infiamna huangah a zuan luh an remti, rim takin training a nei chhunzawm nghal.

Kum 12 mi a nih chuan National Junior Championship-ah pakhatna a ni der tawh. People's Liberation Army Sports Team chuan a theihna hmu fuhin an chher zui a, kum 18 a tlin chuan China tlangvalte duhthusam ni ṭhin Chinese National Badminton Team a zawm.

Lin hian amah ang bawka badminton khel thiam Xie Xingfang a ngaizawng. Xie pawh hi a theuneu lo, hmeichhe badminton world champion ni thei a ni a, 2003 aṭanga inkawp ṭanin 2010 thlasik lai khan an inhual a, 2012 favangah 'tiam tlat e' an ti zui bawk.

Infiammi tam takin an tih angin Lin pawhin tattoo a nei, 2012 Summer Olympic an khelh lai khan a taksa hmun hrang pangaah thil a chhu kai tih hmuh theihin a awm. A ziah zinga mi mak tih leh sawi hlawh chu a ban hman thiam vei lama Kristian Kraws a chhut chu a ni.

A ban ding lamah "until the end of world" tih a ziak bawk. He thu hlawm hi chu a mimal chanchin ziahna lehkhabu hming a ni zui nghal, London Olympic-a gold medal a kawl lai a humhim hnuah he lehkhabu hi tlangzarh a ni a, Chinese badminton player zinga a hmasa ber turin Huaqiao University chuan master degree an pe.

Infiammi kher lo pawhin hming lem, in koh fiamna leh in koh tak tak nana hman kan nei deuh vek. Lin Dan pawh hi 'Super Dan' tia sawi leh koh ṭhin a ni. Koh dan hran chu nei ve bawk mah se Super Dan tih hi khawvelin a hriat lar a ni.

All England Open 2004 final-ah Lin Dan hian Peter Gade chu 9–15, 15–5, 15–8 a hnehin a champion. Final hi a hmuhnawm a, Danish tlangval Gade hi khel ṭha viau mah se Chinese tlangval lakah a ṭang tlang zo lo. Inkhelh banah a khingpui hi 'Super Dan' tiin a sawi a, a hnu lamah media lamin an hmang chhunzawm.

Mihring kan inang lo, ṭhenkhat chu mahni thua 'Super' tih invuah tawk an awm, midangin an pawmpui lem loh tawk lah bo lo. Ṭhenkhat erawh an thil tih leh sulhnuin a phu em vanga midangin hming lem an vuahsak an awm thung. Lin Dan pawh a elpui ngeiin hming lem hi a vuahsak.

Football khel thiam hmingthang Pele chu King of Football tih a ni a, tennis clay court inelna lian French Open vawi 12 champion tawh Rafael Nadal pawh King of Clay tih a ni bawk - badminton khel thiam bik a nih vanga Super Dan an ti pawh hi a inhmeh hle.

Lin Dan hian kum 2000 khan senior huangah inelna a nei ṭan a, season 20 chhung zet chu a chamchilh. Mipa singles match 749 a khel a, heng zingah match 666-ah hnehna changin ṭum 128 chu a chak lo zawkah a ṭang thung.

A hun hmasa lamah hlawhtlinna a chang nghal pup pui bik lem lo. Asian Badminton Championship a khelh hmasak berah chuan amah ang bawka Chinese player Xia Xuanze a hneh lo, nomawi hmasa ber chawi tur chuan 2002 a nghah thlen a ngai - Korea Open-ah a champion.

Kum 2004 a her chhuah chuan Lin tan kum ṭha a ni a, an ram China chu Thomas Cup-ah a chet ṭhat pui bakah mimal inelna Swiss Open-ah a champion a, February thlaah a vawi khat nan BWF ranking-ah world number 1 a ni a, inelna ngaihhlut All England Championship-ah a vawi khat nan hlawhtlinna a chang.

Chinese tlangval hian a vanglai chuan nomawi hlu leh chawi theih sang ang zawng zawng chu a chawi kim a, badminton huangah chuan a sulhnu aia ṭha a awm thei tawh chuang lo ang. Ṭhangtharten a chanchin an chhiar apiangin a ropui zia an hre nawn ṭhin dawn a ni.

Hming    Lin Dan

Koh fiamna    Super Dan

Ram    China

Pianni leh thla    14 October 1983 (kum 36)

Pianna hmun    Longyan, Fujian, China

San zawng    5 ft 10 in (178 cm)

Rih zawng    70 kg (154 lb)

Inkhelh hun    2000–2020

Chawlh hun    4 July 2020

Ban hman thiam    Vei lam

Coach    Xia Xuanze

Gold Medal Record

Summer Olympics

2008 Summer Olympics – Men's singles

2012 Summer Olympics – Men's singles

BWF World Championships

2006 IBF World Championships – Men's Singles

2007 IBF World Championships – Men's Singles

2009 IBF World Championships – Men's Singles

2011 IBF World Championships – Men's Singles

2013 IBF World Championships – Men's Singles

Badminton World Cup

2005 Badminton World Cup Men's singles

2006 Badminton World Cup Men's singles

Thomas Cup

2004 Thomas & Uber Cup

2006 Thomas & Uber Cup

2008 Thomas & Uber Cup

2010 Thomas & Uber Cup

2012 Thomas & Uber Cup

Sudirman Cup

2005 Sudirman Cup

2007 Sudirman Cup

2009 Sudirman Cup

2011 Sudirman Cup

2015 Sudirman Cup

Asian Games

2006 Asian Games – Men's team

2010 Asian Games – Men's singles

2010 Asian Games – Men's team

2014 Asian Games – Men's singles

Asia Championships:

Asia Championships Men's singles

Asia Championships Men's singles

Asia Championships Men's singles

Asia Championships Men's singles

East Asian Games:

2009 Hong KongMen's team

World Junior Championships:

2000 IBF World Junior Championships Mixed team

Asian Junior Championships:

2000 Asian Junior Championships Boys' singles

2000 Asian Junior Championships Boys' team