Champions League - Club lian inlan hun

Europe-a club football inelna sang ber Champions League group stage match tawp ber chu zaninah khelh a ni dawn a, club langsar tak tak Real Madrid, Bayern Munich, Manchester United, Juventus leh Manchester City te an inlan dawn.

Club langsar kan tarlante hian last 16 an lut chiang vek tawh a, zanina an khelh chhan tur ber chu group hmahruaitu nih a, knockout round-a club 'lian' pumpelh a ni ang.

Zanin inkhel tur zingah Manchester United leh Valencia inkhel tur chu ngaihven hlawh bera chhal ngam a ni a, zanin dar 1:30-ah an intawng dawn.

Manchester United-in last 16 an lut chiang tawh a, an tum tur erawh group hmahruaitu nih a ni - chumi tur chuan tla chiang tawh Valencia an hneh a ṭul dawn a, zan dar 1:30 veka inkhelah Juventus-in Young Boys an ngam loh bawk a ngai ang.

Premier League-a che ṭha tak Manchester City-in zanin dar 1:30-ah Hoffenheim an mikhual dawn bawk a, anni pawh hian last 16 lut chiang tawh mah se hmahruaitu an la ni chiang lo.

City tan erawh hmahruaitu ni turin United aiin kawng a awlsam hret a, German club Hoffenheim lakah hnehna an chang a nih chuan last 16 an lut ang.

United chu le
Manchester United-in Premier League-ah beisei an phak loh avangin fan-ten an beisei tur chu Champions League a ni a, last 16 lut tawh mah se group hmahruaitu ni ngei chunga knockout round luh hi an lungdamna tur a ni ang.

United hian Southampton leh Arsenal lakah a zawna hnehna an chan zawh loh avangin coach Jose Mourinho-a'n sawisel a hlawh a, a agent Jorge Mendes chuan kum khata pound maktaduai 15 hlawh coach hi United-ah a hlim thu mipui hriata a sawi a ngai hial.

Mourinho-a'n a thiam thil a la theihnghilh lo tih amah chhantu agent a ṭawngchhuah hnuah a lantir ve zui - Claudio Ranieri hoa insiamṭha mek Fulham chu 4-1 in an sawp a, Valenica an huphurh lutuk lo ang.

Hriat tel atana ṭha erawh United hian Pathianni zanah Liverpool an la mikhual leh dawn a, Mourinho hian last 16 an luh tawh tho avangin hmahruaitu nih ai chuan Liverpool nena an inkhel tur hi a ngai pawimawh zawk mai thei - zaninah an ṭhat dan berin Valencia a hmachhawn lo a nih pawhin a mak lo ang.

City ve thung
Manchester City boss Pep Guardiola-a'n player siksawi a hrat a, zanina an mikhual tur Hoffenheim hian beisei tur an neih tawh bawk si loh avangin awlsam taka an chak beisei a ni a, player a siksawi nual a nih pawhin a mak lo ang.

Group F-ah player langsar awm lohna Lyon leh Shakhtar Donetsk inkhel tur hi a hmuhnawm dawn - zan dar 1:30-ah an intawng dawn a, Lyon tan City hnungzuia last 16 lut turin draw result a tawk a, Shakhtar tan chak a ngai thung.

French club hi dinhmun ṭha zawkah awm angin lang mah se an lenna tur hmun hi mikhual tana khelh harsatna hmun Ukraine a ni a, Ukrainian club zawk hian City an zui a nih pawhin a mak lo ang.

Group E inkhelah Bayern Munich leh Ajax an intawng dawn a, team pahnih hian last 16 an lut chiang tawh a, ngaihnawmna tur erawh a nei - group hmahruaitu nih inchuhna inkhel a ni dawn.

Champions League nomawi kawl lai Real Madrid-in zanin dar 11:25-ah CSKA Moscow an mikhual dawn a, Spanish club hian last 16 an lut chiang tawh a, group hmahruaitu an ni chiang bawk.

Mahse erawh a la awm cheu - Real hian coach thar Santiago Solari hnuaiah insiamṭhat hna an thawk mek a, zanina CSKA Moscow hneh hi an kal zelna tura inrintawkna neih nan a ṭangkai ang.