Joshua team ten min sawm - Wilder

Tyson Fury nena sawisel hlawh taka inhneh-tawk WBC heavyweight champion Deontay Wilder chuan British boxer Anthony Joshua team-te chuan inhnek pui atan a ngena an ngen thu a sawi.

Kum 33 mi boxer hian tun thla tir khan Los Angeles khawpuiah Fury hi sawisel hlawh takin a inhnehtawkpui a, WBC chuan boxer pahnih hi inhnek nawn leh turin thupek a ti chhuak leh tawh.

Wilder chuan Joshua chungchang sawiin, "Tunah chuan a team hian kan inhnek theih ngei dan ngaihtuahin a phiin an phi chung tawh a ni ber a, thawklehkhatah min rawn ngaihven vak a ni," a ti.

American boxer chuan sawi zawmin, "Joshua hian hun ṭha vawi tam a nei tawh a, Luis Ortiz, kei leh Fury te hmachhawn turin hun ṭha a nei vek a ni," tiin Joshua chu tlai khawhnua phi leh chung si-ah a ngai.

Wilder chuan, "Mipui hian tu nge khawvelah ṭha ber hmuh an duh a, a bik takin Fury nena kan inhmachhawn hnuah chuan hriat an chak lehzual. Mahse, min hneh thei an awm hma chuan khawvela ṭha ber ka nih thu ka sawi zel dawn a ni," tiin a sawi.