Tuikual aia thiam zawk Zarkawt BCA

Mizoram Super League final game 1-ah Zarkawt BCA chuan Tuikual South 100-77 in an hneh a, an kut dinglam chuan nomawi a chawi tawhah a ngaih theih - Ningani zan dar 8:00-ah game 2 khelh leh a ni ang.

Thawhṭannni zan Hawla Indoor Stadium, Republic Vengthlanga inkhelah a tir aṭanga a tawp thlengin BCA lam an chungnung a, point 23 a score baka rebounds vawi 14 la a double-double neitu Dennis Lalmuanpuia chu Player of the Night atan thlan a ni.

Bul ṭan fuh

Zarkawt BCA coach Lalruatfela'n semifinal an khelh ṭuma a tih dan pangngaiin a bul ṭantu player panga zingah Cameron Anderson leh Matthew Remtluanga Sailo te a telh lo - basket venhim hmasak a tum tih a chiang.

Zonunsanga, Sowkin Shetty, Lalsangkima, Dennis leh Lalrina Renthlei ten bul an ṭan. Shetty-a'n basket hmasa ber nei nghalin a team hma a hruaipui a, ani hian quarter hmasa berah point 10 a nei tling nghal bawk.

Tuikual South lamin sa huai ser nghalin an point hmasa ber luttu pawh Desmond Antwine Medder a ni. Desmond bakah hian Lalnunpuia Renthlei, Vanlalrinchhana, Lalfakmawia leh Lalfakzuala ten bul an ṭan, captain F. Zodinthara chu bench lamah hun hman hmasak tir a ni thung.

Hei le BCA

Afela'n Matthew-a leh Anderson te a khek rei lo, quarter hmasa ber tawp lamah a rawn dah lut a, a tisual lo hle. Zarkawt club hian chawlhlawk laiin 52-45 zetin hma an hruai fal hman.

American forward Anderson-a'n a pawimawh hunah tak 3-point a vawm lut thei a, quarter thumna an khelh laiin Tuikual lam hian an inkar ti zim ve deuh mah se hun tawp hma chiahin Zonuna'n 3-point a vawm lut, he point hian BCA dinhmun a sawhngheh zual bakah TKS beiseina a thamral tir tia sawi theih a ni.

BCA hian league round leh semifinal game vawi hnih an khelh chinah khan vawi khat chiah point 80 hmuh tlin loh an nei a, tun MSL bikah erawh tun ṭum hi point 100 an hmuh tlin vawi khatna a ni - an basket an venhim ṭhat bawk avangin a zawna champion turin an dinhmun a ṭha ta hle.

TKS an zuih

League round-ah hneh lo mah se Tuikual South lamin phuba lak let ngei an tum a, an innghahna Desmond-a'n point 46 ngawt a neih bakah rebound vawi riat la thei mah se, an player ṭha hi tualchhung player ten an thlawp ṭha tawk lo.

R. Lalnunpuia (15pts) bak point 10 nei tling thei dang an awm lo - Fakzuala, Rinchhana leh Fakmawia ten nidanga basket an neih ṭhinna angah an hlah nasa a, hun ṭha an neih tam zawk an hman ṭangkai theih loh avangin an tho chhuak thei lo.

Season hmasa khan Phengphehlep hian final-ah bawk BCA hi an ngam lo, assistant coach

R. Liansangpuia naute hian an sulhnu ṭha lo nawt reh chunga nomawi chawi an duh a nih chuan game 2-ah sawisel tur awm loa khawpa ṭhain an khelh a ngai dawn a ni.