Everton leh Watford inhnehtawk

Thawhṭanni zan khan Pre­mier League-ah inkhel pakhat a awm a, season thara European football khelh inbeisei Everton chu an mikhual Watford nen 2-2 in an inhnehtawk a, table-ah pasarihna an ni.

Everton lamin Richarlison hmangin hma hruai mah se mikhual lamin Seamus Coleman-a own goal hmangin an sut a, Watford tana Abdoulaye Doucoure khung chu hun tawp dawna Lucas Digne-a free kick chhuih luh hmangin an sut hram.

Club hlui

Tun hma deuhin Marco Silva hian Watford a enkawl chungin Everton hi a enkawl dawn tih thawm a awm a, hei vang hian Watford lamin an manager hi an ban - manager inchhuhsakna anga sawi theih a ni.

Goodison Park-a inkhelah Everton lamin bul an ṭan fuh hle a, Silva-a'n Watford aṭanga a chhawm Richarlison chuan minute 15-na lekah goal hmahruai a khung, goal a luhna kawngah Theo Walcott chu offisde angin lang mah se an ham lo hlauh.

Chawlhlawkah goal dang a luh belh lo a, minute 63-naah Roberto Pereyra chuan na zetin goal ban pet per mah se a pet let leh chu Coleman-a'n anmahni lamah a ti lut palh. Toffees lam an insiamrem hman lo, goal an neih aṭanga minute hnih hnu lekah Doucoure chuan Coleman paltlangin keeper Jordan Pickford dan hman loh goal a khung bawk.

Silva naute an beidawng duh bik lo, hun tawp nan minute khat pawh a awm tling tawh lo tihah Digne chuan a club tana a goal hmasa ber ni turin freekick a chhuih lut a, keeper Ben Foster tan dan hman a ni lo.

Watford an lawm

An manager bakah player ṭha chhuhsaktu laka hnehna chan tumin Watford an thawk chhuak a, an duh ber point thum hmu lo mah se point khat an hmuh theih avangin an tan lawmna tur a awm tho.

Watford manager Javi Gracia chuan, "Richarlison hian season hmasa khan goal min khung sak lo a, tun ṭum kha goal a khung ka hmuh vawi khatna a ni, ka lawmpui hle. Goal tam zawk khung belh tur pawhin duhsakna ka hlan," tiin a sawi.

Inkhel chungchang sawi zuiin Gracia chuan, "EPL-ah hian VAR hman ni tawh se chuan inkhel result ṭhenkhat hi a danglam mai thei, goal kan chhuah hmasa zawk pawh kha pawm a ni kher lo ang. Chutihrualin kan la hman loh thil a nih miau avangin kan tawn chinah hian lungawi thiam a pawimawh," a ti.

Point hloh

Everton tan season thara European football khel tur chuan chak a pawimawh a, a bik takin anmahni aia team nem zawka ngaih lakah phei chuan point thum hmuh theih a pawimawh zual.

Marco Silva chuan, "Wat­ford goal pahnih kha kan tihsual vanga lut a ni, kan result hi kan tan chuan lawnna chi a ni lo ang. Hnehna chang thei turin bul kan ṭan fuh hnuah a hmawr kan bawk fuh lo leh ta a, match lehpekah chuan a hmawr bawk dan ṭha kan neih tawh ka beisei," a ti.

Everton hi an match hnu­hnung zawkah Newcastle nen 1-1 in an inhnehtawk tawh bawk a, tun ṭumah hian hnehna chang thei ni se la chuan an chunga awm Manchester United khumin parukna din­hmun an luah thei ang. Mahse, holam taka goal hnih an chhuah vangin pasarihna an nih chhunzawm a ngai.