Sindhu hmabak a hautak dawn

Vawiin aṭang hian badminton player ṭha zual pariat inelna BWF World Tour Finals khelh ṭan a ni dawn a, Olympic silver medalist PV Sindhu tan kawng a awlsam dawn lo, a vawi khat nana inlan Sameer Verma erawhin knock out stage luh theihna kawng a nei dawn niin a lang.

Season hmasa lama pahnihna dinhmun luahtu Sindhu hi Group A-ah champion lai Akane Yamaguchi, world number 1 Kento Momota bakah Beiwen Zhang te nen an awmkhawm dawn a, player palite hi champion tur pawha rinkai vek an nih avangin inkhel hmuhnawm beisei ila a sual lo tura ngaih a ni.

Indian shuttler hian a match hmasa ber atan Yamaguchi a hmachhawn dawn a, a khingpui tur nen hian tun hma lama an intawn tawhnaah 9-4 a hma a hruai avangin beiseina chu a nei.

Kum 23 mi Sindhu chuan, "Inbuatsaihna ṭha ka duh a, hei vang hian tournament ṭhen-khat pawh ka khelh loh phah hial. Badminton inelna zingah chuan a lian berte zinga mi a ni a, ka taksa fit ṭhat lai a nih bawk avangin beiseina pawh ka nei sang hle," tiin a sawi.

Mipa singles lamah Sameer chu Japanese world number 1 Kento Momota, Indonesia tlangval Tommy Sugiarto leh Thailand shuttler Kantaphon Wangcharoen te nen an awmkhawm a, match hmasa berah Momota nen an intawng ang.

Group tina player tin an inkhelh kual hnuah a sang pahnih ten semifinal an lut dawn a, hei vang hian match tin hi a pawimawh vek dawn tihna a ni.

Tun hma deuhin player ṭha pariat inelnaah hian Saina Nehwal pawh a inlan tawh ṭhin. Mahse, Indian shuttler hi ṭum sarih a inlan zingah a champion miah lo, 2011 khan final lut mah se nomawi a chawi zo lo a ni.