Boston Celtics an sang zel

NBA regular season kal laiah Boston Celtis an chefuh chhunzawm zel, nimin zing inkhelah Boston tan Marcus Morris leh Jayson Tatum te point hmuh inbelhkhawm chu 52 niin an team hi New Orleans Pelicans lakah 113-100 in hnehna an chanpui.

Celtics player thawhhlawk ber Morris chuan point 31 a nei a, ani hi point 21 neitu Tatum chuan a thlawp ṭha hle bawk. Player langsar ṭhenkhat Al Horford (khup), Kyrie Irving (koki) leh Gordon Hayward (dam lohna) te chhawr thei lo mah se player dang an ṭangrual ṭha a, an mammawh tawk point an nei thei.

New Orleans lam tan point 41 zet neitu Anthony Davis chu player mala thawhhlawk ber a ni a, ani bakah hian point 20 a neih bakah rebounds vawi 11 latu Julius Randle che ṭha viau bawk mah se player dang aṭangin thlawpna an dawng fuh tawk lo. Hliam vanga E'Twaun Moore khel thei lo an tuar a, ke rek na Nikola Mirotic chu a la inlan thei lo bawk.

Nimin zing inkhel dangah Oklahoma City Thunder chuan 122-113 in Utah Jazz an hneh a, Clippers pawhin Suns chu 123-119 in an hneh ve bawk a ni.