USA-ah Barcelona inkhel leh dawn lo

Barcelona chuan January-a Girona nena USA-a an league match khelh tur chu an ṭhulh leh thu an puang a, "Kan vaia inremna a awm a nih loh chuan kaltlangpui kan duh lo a ni," an ti.

Spanish football league sang ber La Liga thuneitute chuan media company Relevent chu kum 15 chhung atan contract an ziahpui a, kumtin USA lama team tinin league match khat ṭheuh khel turin inremna an ziahpui.

Girona chuan hei hi remchangah lain January 27-a Barcelona an mikhual tur chu Spain-ah ni loin USA lama mikhual an tum a, inbiakna kalpui a nih hnuah Barca hian an remti.

Mahse, USA lama league match khelh hi Spanish Football Association leh Players' Union lamin an duh lohna thu uar takin an sawi tawh a, Barca chuan he thila inhnamhnawih zawng zawng an inrem loh chuan Miami-a inkhelh luih hi an duh lo a ni.