Buaina lo kiang rawh, i tan Liverpool an lian lua e

Liverpool-in first choice player Virgil van Dijk, Trent Alexander-Arnold, Joe Gomez, Jordan Henderson, Thiago Alcantara leh Mohamed Salah chhawr thei lo mah se, hliam leh damlohnain Reds a chelh ding zo lo. 

Pathianni zan Premier League inkhelah Liverpool hian 3-0 in Leicester City an sawp a, Jonny Evans (own goal), Diogo Jota leh Roberto Firmino-ten Liverpool tan  goal khat ṭheuh an khung.

Liverpool damdawi in a lun lai ber a ni a, Anfield-a an inkhelh dan hmuh erawh chuan Reds hian buaina an nei miah lo emaw tih mai tur a ni - Jose Mourinho, Pep Guardiola leh Frank Lampard-ten he inkhel hi an en a nih ngat chuan Liverpool nomawi chhuhsak hautak turzia an hrethiam ang. 

Reds hian an khelmualah league match 64 chhung chu tlawm an nei ta lo a, February 1978 - January 1981 inkara an club record lo siam tawh chu an khum.

Phuahchawp liau liau!

Liverpool-in first choice player an chhawr theih loh nual avangin Jurgen Klopp-a player remkhawm dan tur chu mipui hmuh châk a ni a, an hmachhawn tur hi team 'form' tak Leicester City an nih bawk avangin Reds fan-ten hlauhthawnna nen an thlir. 

Tlarhnungah midfielder James Milner chu right back anga chhawr a ni a, centre back-ah midfielder Fabinho leh Joel Matip inkawp tir an ni a, mual vei lam sirah Andy Robertson a awm - Milner tih loh zawng hi hliam dam kawr vek an ni!

Leicester-in tlarhmaah player tlan chak leh finishing tawih Jamie Vardy, European club liante chil ti puttu James Maddison leh player ṭhangduang Harvey Barnes-te bul an ṭantir thei a, Liverpool an ngaihtuahawm takzet. 

Mahse, rin lawk ang ngawtin thil a thleng lo. Inkhel hamrik a rik rualin Reds an hmuhnawm nghal a, kil tinah Foxes hian an ngam lo a ni ber - goal khung chakin Merseyside club an tui hal a, Sadio Mane, Diogo Jota leh Roberto Firmino inkawp chu Liverpool tlarhnung aiin kan hmu ngun zawk. 

Minute 21-na a ni a, Liverpool-in an phu ang ngeiin goal an khung. Corner aṭanga ball kal chu Mane vengtu Evans-a'n tauh chhuah a tum a,  keeper Kasper Schmeichel-a dan rual lohin an lamah a tauh lut ta zawk!

Liverpool-in inkhel an thunun chhunzawm a, minute 41-naah Jota chuan Robertson-a ball cross ṭha zet chu rang taka tlan lutin a tauh lut - Reds player zingah Anfield-a a match hmasa palia goal khung vek thei hmasa ber a ni. 

Second half-ah Leicester an ziaawm hret a, inkhel thununtu erawh Liverpool tho an ni. Tun hnaia sawisel hlawh tak Roberto Firmino chuan 'team player' ni mah se goal khung a thiam ve tho tih pholangin an goal thumna a khung a, 3-0 in Reds an chak. 

Reds hi an vanneih ṭum ni se goal dang khung thei an ni - Mane khung tur nia lang chu  keeper Kasper Schmeichel chuan ṭha zetin a dansak a, Firmino hian post a tih per bakah goal tura lang tawh chu line aṭanga petchhuah sak a ni bawk. 

Liverpool-in an phu ang ngeiin point thum an hlawh chhuak a, an lawm erawh a kim lo - midfielder Naby Keita chu minute 54-naah hliam vanga lakchhuah a ngai a, he thu buatsaih lai hian a dinhmun hriat chian a la ni lo. 

Reds manager Jurgen Klopp chuan, "Hliam vanga Naby Keita lakchhuah a ngaih kha chuan kan buainain zia lam a pan lo tih a lang chiang hle. A pawimawh ber chu ngai kan awh chhoh leh a ni a, mahse Keita hliam hian min pui lo hle," a ti.  

Leicester an hmachhawn hma hian Xherdan Shaqiri-a'n hliam tenau a nei tih an hre chhuak bawk a, hetihlai hian Covid-19 vanga Foxes hmachhawn thei lo Mohamed Salah chuan training a zawm leh tawh. 

Liverpool hian Nilaini zan dar 1:30-ah Champions League group stage match khel turin Atalanta an mikhual zui dawn a, khualmuala 5-0 a an sawp tawh team lakah hian hnehna an chan chuan last 16 an lut chiang ang.