Man City - Liverpool zawhah Atletico Madrid
Manchester City-in Premier League-ah Liverpool an hmachhawn zo chauh a, zanin dar 12:30 hian Champions League quarterfinal second leg-ah Atletico Madrid an hmachhawn dawn. First leg-ah Kevin de Bruyne goal hmangin Man City hi 1-0 in chak mah se zanina an inkhelhna tur hi Atletico khelmual Wanda Metropolitano Stadium a ni.
Champions League nomawi duha tuihal Pep Guardiola tan inkhel pawimawh bik a ni a, amaherawhchu kartawpah Liverpool nen FA Cup semifinal an khelh dawn avangin sa huai ser a rem lo. Man City hi dinhmun ṭha zawkah ding mah se an khingpui tur hi Diego Simeone hote an nih miau avangin engmah a chiang lo.
Beisei dan angin
Man City leh Liverpool inkhel 'class sang' zet vangin Pep Guardiola hoten Atletico Madrid an mikhual kha kar khat liam ta chauh a ni tih hre chang tawh lo an awm nual ang.
Etihad Stadium-ah khan beisei ang chiahin thil a thleng a, Man City-in inkhel thununin 68% ball possession an chang. Atletico pawh Atletico khelh ṭhin dan angin an khel a, tlarhnung a phui ṭha hle.
Diego Simeone hote hian darkar khat chuang hret chu an tum tihlawhtling mah se Phil Foden rawn luh hnuah an ṭang khawng zo lo. Foden hian minute 70-naah Kevin de Bruyne a siamsak a, Belgian midfielder hian goal awmchhun a khung.
Man City hian inkhel an thunun a, Atletico-in minute 90 chhungin goal zawnah vawi khat pawh an pet lo. First leg aṭanga thlir mai chuan English club hi chak mai tura ngaih a ni. Amaherawhchu football-ah thil chiang a awm lo.
Man City leh Liverpool inkhel ṭum pawhin Pep-a hoten first half an thunun a, Reds-in tih ngaihna tak an hre lo. Halftime-ah Man City-in 2-1 in hma an hruai a, second half ṭan chiahah Jurgen Klopp-a hoten goal an rawn khung a, goal dang a luh belh lo. Khelh ṭhat ringawt hi chakna a ni lo tih Pep-a hoten an hriat nawn phah ngei ang.
Game plan chu
Khawvel manager zinga game plan duang thiam ber zinga mi Pep Guardiola fiahin a awm dawn. Spanish manager hian Reds nena FA Cup semifinal an khelh leh tur a chhut lawk a ṭul bakah Premier League match an khelh hnuhnung bera an khelh dan a chhut tel a ngai a, thutlukna engpawh siam se Atletico hneh theihna tur a nih a ṭul.
Man City hian Pathianni zan inkhelah chak taka tlan (sprint) vawi 181 an nei a, tun season Premier League inkhelah sprint an ngah ber. Chumi awmzia chu Pep-a'n squad a siksawi a ṭul dawn tihna a ni.
Defender ṭha mi Kyle Walker-a'n hremna a hmang zo tawh a, chhawr theihin a awm tawh. Amaherawhchu first leg-ah Nathan Ake-a'n City tlarhnungah hna ṭha tak a thawk. Ruben Dias pawh a dam hnai a, Atletico lakah erawh Portuguese defender hi a inlan a rinawm loh zawk.
Pep-a'n thutlukna huaisen siamin tun hnaia bul a ṭantir tam loh Phil Foden leh Gabriel Jesus te chu Liverpool lakah bul a ṭantir. Brazilian forward Jesus hi hrem vangin second leg-ah a inlan thei dawn lo. Man City erawhin a thlakna tur an nei ṭha - Jack Grealish leh Riyad Mahrez te an la kawl a, Reds laka bul ṭantu Sterling pawh a awl zawk thei hial.
Chutihrualin squad nei ṭha Man City pawhin innghahna bik an nei a, a hming chu Kevin de Bruyne a ni. Belgian midfielder hian first leg-ah goal awmchhun a khung a, Liverpool lakah pawh goal hmahruai khungin pass ṭha a ngah hle. Atletico-in semifinal thlen an duh a nih chuan KDB chelh dan an ngaihtuah a ṭul ang.
Pa huaisen Simeone
Man City an ṭha a, chak tura rinkai an ni a, club ṭhahnem tak chu tlawm sain an khel hial ang. Diego Simeone erawh tlawm saa khel tur a ni ve lo - chak theih dan tur a ngaihtuah dawn. Argentine manager hian ball chan tam a tum ve kher dawn lo a, game mawi khelh an tum dawn lo a, an thiam danin an khel ang.
Atletico hna hmasa tur chu Man City dan chah a ni a, chutihrualin first leg-ah an chak tawh loh avangin goal khung an mamawh. Atletico defender Stefan Savic chuan, "1-0 a chak loh chu thil pawi a ni hleinem. Madrid-ah chuan a danglam khawp ang," tiin a sawi a, Simeone hote an nih miau avangin an rilru pawh a paukhauh ang.
Diego Simeone chuan, "Man City hi khawvela team ṭha ber an ni hial ang. Second leg-ah pawh City hi an khelh dan a la ngai dawn a, keini erawh a danglam hret ang. Inngaitlawm takin theihtawp kan chhuah ang a, kan thlen chin chu hunin a hril ang," tiin a sawi a, Argentine manager thusawi hian inkhel en a tichâkawm zual sawt.
Atletico hian Man City laka goal an khung loh hnuah kartawp khan Mallorca 1-0 in hneh lo a, match hnuhnung pahnihah goal an khung lo. Amaherawhchu Antoine Griezmann leh Joao Felix te hi chu an khelh ṭhat niah chuan team chakpui thei an ni a, hrem vanga first leg khel thei lo Yannick Carrasco pawh a rawn kir tawh dawn.
Simeone hoten anmahni ang bawka Champions League la chawi ngai lo Man City hneh an tum dawn a, a awlsam dawn lo. A chhan chu Man City hi khualmualah match 12 chhung hneh loh an tawng tawh lo a, minute 630 chhungin goal khat chiah an chhuah bawk.
Atletico an hrem
UEFA-in Atletico fan-te first leg-a an chet mawi loh avangin Spanish club-ten hremna an tawk. Second leg-ah hian entu 5,000 ṭhutna chu an khar a ṭul dawn a, Wanda Metropolitano-a ṭhutna 68,456 awm chu a khat thei dawn lo tihna a ni. Atletico hian "#NoToRacism" tih chuanna banner chu an tarchhuah a ṭul bawk ang.
Inlan tura beiseite
Atlético: Oblak; Vrsaljko, Savic, Felipe, Reinildo, Carrasco; Marcos Llorente, Herrera, Koke; Correa, Joao Felix
Chiang lo: Herrera (malpui), Gimenez (chawn)
Man. City: Ederson; Walker, Stones, Laporte, Joao Cancelo; De Bruyne, Rodri, Bernardo Silva; Mahrez, Foden, Grealish
Khel thei lo: Gabriel Jesus (hrem), Palmer (ke)
Chiang lo: Rúben Dias (malpui)
Champions League Quarterfinal
First Leg
April 5, Thawhlehni Zan
Manchester City 1 - 0 Atletico Madrid
MAN: Kevin De Bruyne 70'
Benfica 1 - 3 Liverpool
BEN: Darwin Nunez 49'
LIV: Ibrahima Konate 17'; Sadio Mane 34'; Luis Diaz 87'
April 6, Nilaini Zan
Villarreal 1 - 0 Bayern Munich
VIL: Arnaut Danjuma 8'
Chelsea 1 - 3 Real Madrid
CHE: Kai Havertz 40'
REA: Karim Benzema 21', 24', 46'
Second Leg
Nizan Inkhel (Result kan hre hman lo)
Bayern Munich 12:30 AM Villarreal
Real Madrid 12:30 AM Chelsea
Zanin Inkhel Tur
Atletico Madrid 12:30 AM Manchester City
Liverpool 12:30 AM Benfica