Cricket Association leh Samagra Shiksha Mizoram ten inremna an ziak

Nimin khan Samagra Shiksha Mizoram leh Cricket Association of Mizoram (CAM) ten Education Complex Conference Hall, Mc Donald Hill, Zarkawtah kum nga chhung daih thawhhona thuthlung an ziak.

Thawhhona thuthlung hi Lalhmachhuana, State Project Director, Samagra Shiksha Mizoram chuan a kaihruai a, Dr Lalzirmawia Chhangte (IAS), Secretary, School Education Department chu khuallian niin CAM hruaitute leh United Sports Association of Mizoram hruaitu ten thawhhona thutlung ziah hi an telpui a ni.

Thawhhona tur hi a bul ṭan nan Aizawl khawpui chhunga sorkar sikul Primary leh Middle School thlanchhuah sikul sawmah bul ṭan phawt a ni ang. Kum thar aṭangin Aizawl pawn leh district dangah te kalpui zel a ni ang. Thawhhona tur thuthlung aṭanga a lan danin, naupangten an zirlai tibuai lo thei tur ang berin kar khatah vawi thum training an nei ang a, sum leh pai senso ngai zawng zawng leh cricket thuam thil leh training-na atana mamawh zawng zawng CAM ten an tum dawn.

Naupang talent nei ṭha zualte kum tin National Cricket Academy Bangalore-a training an neih dan tur kawng an zawnsak dawn a, Mizoram pawnah exposure trip neih tir ṭhin tur a ni. Grassroots Cricket School-ah hian qualified coach dah vek an ni ang. Grassroots Cricket School hmang hian Enrollment Drive leh Retention Drive neih tum a ni bawk.