Chanmarians an chak chiang

Tualchhung cricket inelna lian - Mapuia Memorial Cricket League khelh laiah, nimin khan Chanmarians chuan an match hmasa ber khelin Bawngkawn South chu 79 runs zetin an sawp.

Suaka Cricket Ground, Sihhmuia league round inkhelah Bawngkawn South lamin vawm hmasak an thlang a, an thlang sual. Chanmarians tan Lalhruaizela (59 runs) leh K. Lalremruata (57) te an che ṭha, target an bituk chu 135 a ni.

Bawngkawn South tan 15 runs siam tling an awm thei lo, team pumpuiin 55 runs bak an tlin lo. Lilamna aṭanga in lei tling Bawngkawn hian match hmasa berah beisei an phak lo.

Match hmasa hi over 20 tur ni mah se, a huna match an ṭan loh avangin over 20 ni tur chu over 17-ah tih tlem a ni. Over 17 chhunga Chanmarians chet dan a ṭha tawk hle.

Chanmarians hian vawiinah Ramhlun Venglai an hmachhawn leh nghal dawn. RVL hian Kulikawn hnehin bul an ṭan ṭha a, vawiin chawhma lama inkhel tur hi team ṭha bik pahnih an nih avangin a hmuhnawm ang.

Nimin inkhel hnuhnung zawkah Chhinga Veng chu Kulikawn lakah 17 runs-in an chak lo. Mahuma Memorial finalist 3C hi an match hmasa zawkah Luangmual nen point an insem a, match hnih an khelh tawhah chak ni hmel an la hmu lo.

Vawiin Inkhel Tur - Round 2
Ramhlun Venglai 09:00 AM Chanmarians
Bawngkawn South 01:00 PM Luangmual

Nimin Results - Round 1
Chanmarians (134/1) bt Bawngkawn South (55/9)
Chanmarians hi 79 runs-in an chak
Toss: Bawngkawn South lamin vawm hmasak an thlang
PoM: Lalhruaizela, Chanmarians

Round 2
Kulikawn (129/5) bt Chhinga Veng (112/9)
Kulikawn hi 17 runs-in an chak
Toss: Chhinga Vengin vawm hmasak an thlang
PoM: C. Lalrinsanga, Kulikawn