Liverpool tan hna a la zo lo

Premier League 'final' tih hiala sawi inkhelah Liverpool-in Manchester City an inhnehtawkpui zo chauh a, hna hautakin Reds a lo hmuak lehnghal - Champions League lam hawi a hun.

Zanin dar 12:30-ah Champions League quarterfinal second leg khel turin Liverpool an inlan dawn a, Portuguese club ṭha Benfica an mikhual ang.

Merseyside club hian first leg-ah 3-1 a hnehna an lo chan tawh avangin an hna a awlsamah a ngaih theih a, mahse, City laka khel chau team hi Benfica-in hneh theih an inbeisei dawn.

Liverpool hi an fixture a hautak hle - Benfica an mikhual zawhah FA Cup semifinal-ah City (April 16) an hmachhawn leh ang a, April 19-ah league match khel turin Manchester United an mikhual zui ang!

Squad chhah Reds
Reds-in quadruple champion nih an tum miau a, an fixture a hautak lo thei lo. Reds defender Andy Robertson pawhin hei hi a hrechiang a, Scottish left back chuan, "Thil dang ngaihtuah loin kan match khelh leh tur chiah kan ngaihtuah ṭhin," a ti a, match dang ngaihtuah tel a duh lo.

Tun season-a Liverpool vanneihna chu season hmasa anga hliamin a tibuai tam lo hi a ni a, zaninah pawh Klopp-a'n a player neih aṭangin inlan turin a duh apiang a thlang thei - an dam kim.

City laka bul ṭan aṭangin Sadio Mane leh Diogo Jota chu hahdamna hun pek an nih a rinawm a, Roberto Firmino, Luis Diaz leh Mohamed Salah te tlarhmaah an inkawp dawn tihna a ni - Benfica tan zuam chi an la ni chuang lo.

Etihad Stadium-a inkhelah Klopp-a'n Takumi Minamino, Harvey Elliott, Divock Origi leh Alex Oxlade-Chamberlain te chu squad-ah pawh a dah lo a, zaninah inkhel chau lo hman tur a nei nual tihna a ni.

Benfica beiseina
Portuguese club-in Anfield an pan hmaa an league match hnuhnung berah Belenenses SAD chu 3-1 in an hneh a, inrintawk an mamawh lai taka hnehna an chang hi an lawm khawp ang.

Benfica coach Nélson Veríssimo-a'n Belenenses an hneh ṭumin Liverpool nena an inkhel tur a thlirlawk a, a neih ṭhat Gilberto, Alex Grimaldo, Rafa Silva, Julian Weigl leh Goncalo Ramos te an inlan lo vek.

Tottenham Hotspur defender hlui Jan Vertonghen pawh hrem vangin a inlan lo a, zaninah erawh a inlan thei dawn - amah ang thoa tawnhriat nei ṭha Nicolás Otamendi nen an inkawp leh ang.

Veríssimo-a'n league match hnuhnung bera player a rem dan thlirin, Champions League-ah beisei a la nei reng tih a lang chiang a, Anfield-ah thil mak thlentir an tum dawn a ni.

A hming Nunez
Benfica-in player thiam bik an nei a, a hming chu Darwin Núñez a ni. Kum 22 mi striker hian first leg-a an chak loh hlim khan, "Liverpool hi team ṭha tak an ni a, mahse, kan hlau lo. Second leg-a result ṭha tak nei turin theihtawp kan chhuah ang," tiin a lo sawi tawh.

Arsenal, Manchester United, Chelsea leh Paris Saint-Germain te chu Nunez enthlatu langsar an ni a, club thuneituten zaninah Uruguayan striker inkhel hi an en bik ang.

Nunez hian Reds an hmachhawn hmaa an league match hnuhnung berah hattrick a siam a, tun season inelna hrang hrangah match 36 khel tawhin goal 31 a khung tling tawh.

Reds nena an intawn hmasak zawkah pawh Nunez-a'n goal a khung tawh a, Anfield-ah thil mak thlentir beisei chungin, Reds fan-te ngawihtir a tum ang.

Thawnthu hlui
Liverpool hian Champions League-a Portuguese club an hmachhawn hnuhnung pakuaah tlawm an nei lo a, vawi sarih an chak a, vawi hnih an inhnehtawkpui - Benfica hna a hautak dawn.

Chutihrual chuan March 2006 khan Benfica hian Anfield-ah ngei Liverpool hi an lo hneh tawh a, thawnthu hlui her lum leh an tum ang - first leg-ah 3-1 in an tlawm a, second leg-ah penalty hmanga chak zawk zawng tur pawhin 2-0 tala chak a ngai thung.

Tlarhmaah Nunez awm mah se Liverpool-in Virgil van Dijk an nei tih hriat a ṭha a, VVD kawppui turin Joel Matip aiah Ibrahima Konaté chu lut tura ngaih a ni bawk.

Reds-in full back ṭha mi Trent Alexander-Arnold leh Robertson an nei a, player pahnih an chau deuh a nih pawhin Joe Gomez leh Konstantinos Tsimikas te lut turin an awm.