A lo kirna inkhelah Wawrinka chak lo

Thla 13 hnua a vawi khat nan Stan Wawrinka chu ATP hnuaia inelna sangah a lo kir leh a, mahse a match hmasa berah a chak lo. Wawrinka hi Alexander Bublik hneh loin Monte Carlo Masters first round aṭanga vuak tlak a ni.

Grand Slam vawi thum champion tawh hi 2021 tir lam khan a inhliam, a ke phah hliam hi March thlaah zai zui niin a chawl rei vang vang hle. Tennis chawlhsan mai tura a lan hnuah a rawn kir ve leh hram.

Thawhṭanni zan inkhelah Swiss star hi 3-6, 7-5, 6-2 in a chak lo. Kum 2014-a a champion tawhna hmunah hian hnehna chang tur pawhin remchang a nei, set hmasa ber pawh a la hial.

Mahse, set hnihna lak theihna remchang a neih a bawhpelh, kum 24 mi Bublik-a'n set thumnaah thahrui la ngah zawk a nihna lantirin, a khingpui service chhuhsakin a chungnung ta zawk.

Inkhel dangah 2019 champion Fabio Fognini chuan Arthur Rinderknech 7-5, 4-6, 6-3 in a hneh a; Sebastian Korda-a'n Botic van de Zandschulp 7-5, 6-4 a hnehin Albert Ramos-Vinolas pawhin Tallon Griekspoor 6-4, 4-6, 6-2 in a paltlang.