Lakers-in coach Vogel an ban

Los Angeles Lakers chuan an head coach Frank Vogel an ban. Lakers hian NBA regular season an hman chhiat em avangin playoff an khel phak dawn lo, a sang zual pariat zinga tel phak loh hi mualphona lian tak a tling.

Vogel kaihhruaina hnuaiah Lakers-in regular season-ah match 33 hnehna an chang a, mahse vawi 49 tehmeuh an tlawm thung. Western Conference table-ah 11-na ni chungin season an khar.

Lakers general manager Rob Pelinka chuan, "Frank hi coach ṭha tak a ni a, mihring kawm nuam leh mi ṭha tak pawh a ni. Tuna kan thutlukna siam pawh hi harsa kan ti hle, mahse kan ṭhat tlan nan a ngai bawk si.

"Team tana theihna zawng zawng hlan mi nena inṭhen chu a harsa, mimal tak pawhin ka zah hle," a ti. 2019-20 NBA champion nih puitu coach a nihna an la hre reng a, kuminah che ṭha lo mah se an zahna a la tla hniam lo.

Vogel hi a vanduai ve bawk, a player pawimawh LeBron James, Anthony Davis leh Russell Westbrook ten hliam an tuar ngun. Player pathum hian vawi 21 chiah inlan rual an nei, an chakna thahrui a hmang rual thei lo tihna a ni.