HPC Cup 2022 an khel ṭan

Lunglei District-a veng leh veng, khua leh khuate football-a inelna ngaihhlut hlawh ber HPC Cup 2022 chu C. Ṭhuamluaia Mual, Lungleiah nimin khan khelh ṭan a ni a, khuh hawnna hman a nih hnuah match pangngai an khel nghal.

Hawnna hun hi Rongaia Ralte, vice president, Lunglei District Football Association chuan a kaihruai. C. Lalremsanga, DS&YO chuan official jersey a tlangzarh a, Odisha FC player S. Lalhrezuala kaihhruaina hnuaiah Oath Taking neih a ni bawk.

Lunglei DFA president PC Lalramnghaka chuan, hrileng avanga tournament buatsaih theih a nih loh hial a hlauhawm tawh hnua tournament buatsaih a ni chu lawmawm a tih thu a sawi.

Ṭhuamluaia Muala artificial grass phah chhe lutuk chu siamṭhat a nih theihna'n, Lunglei DFA-in vawi engemawzat Mizoram chief minister leh sports minister hnena thlen a nih thu leh tournament zawh hnu hian, a ṭha ber chi FIFA World Class - Astroturf hmanga phah ṭhat a nih tur thu a sawi.

Inelnaah hian mipa team 32 an tel, tun ṭum HPC Cup-ah hian kum danga la tih ngai loh hmeichhe inelna siam tel a ni a, VC team 11 an tel.

Lungleia final round khelh a nih hma hian LDFA hnuai Zone FA paruk, thingtlang hmun kilkhawr zawkah khelh a lo ni tawh a. Heta ṭanga tlingte leh Lunglei khawpui team ten final round hi an khel a ni.

Final hi April 29, 2022 a khelh turin ruahman a ni. HPC Cup-ah hian Electric Veng chu champion lai niin champion ngun ber an ni bawk.