Vawiinah Veteran Football final

G.I.G. Motors Veteran Football Tournament final chu vawiin chawhnu dar 1:30 hian RG Stadium-ah khelh a ni dawn a, AMC Ward 9 leh AMC Ward 4 te an inkhel ang.

Ward 9-ah hian Dawrpui, Saron Veng, Chhinga Veng leh Tuithiang Veng te an awm. Mizo football-a 'living legend' S. Malsawmtluanga an kawl a, an player pawimawh a ni. Hranghlui defender ṭha pahnih Hrangzuala leh Hnehthanga-te bakah Aizawl FC, PHE tana khel tawh H. Vanhlupuia te an nei.

Chutihrualin team innghah-na tur erawh Lalrin Earth Movers leh Police keeper hlui Zarzoliana a ni thei ang. Mizo football coach hriat hlawh tak Lalthawmmawia'n (Mamawia) a enkawl a ni.

Ward 4-ah Ramhlun South, Ramthar, Ramthar North leh Aizawl Venglai-te an awm a, player langsar pawh an kawl hnem. Subroto Cup top scorer ni tawh Danny Lalduhawma bakah Shillong Lajong captain hlui Samson Ramengmawia-te an kawl a, Services player hlui Samuel-a an nei bawk.

Team enkawltu hi HC Zarzo-liana a ni a, Zara hian a team enkawl Santosh Trophy, MPL, National Sub Junior Football bakah veng inelna thlengin a champion pui tawh - veteran football-a hi a bi kim nan a pawimawh.

Ward 9 hi an tlarhnung a phui ṭha a, Police keeper hlui Vanlalchhuanga an kawl. Final lut turin penalty shootout-ah ṭum hnih an chak a, bench aṭangin Lalduhawma (Taua) rawn lutin Zion Shopper keeper hlui hian hnehna a chanpui ve ve.

Champion team hian Rs 1,00,000 an dawng dawn a, pahnihnain Rs 50,000. Mimal lawmman hi best player leh top scorer bakah position hrang hrang goalkeeper, defender, midfielder leh forward a che ṭha ber thlan a ni ang.

Final - Vawiin Inkhel Tur
AMC Ward 9 01:30 PM AMC Ward 4