Mizo telna Mumbai-in thawnthu thar an ziak

AFC Champions League-ah a vawi khat nan Indian club an chak - i chhiar dik e, Mumbai City chuan Thawhṭanni zan khan 2-1 in Air Force Club an hneh a, Indian club zinga Champions League-a chak hmasa ber an ni.

Iraqi club tan Hammadi Ahmed chuan goal hmahruai khung mah se Mumbai-in Diego Mauricio 'penalty' leh Rahul Bheke goal hmangin an chhanglet a, 2-1 in an chak.

Mumbai City tan hian Lallianzuala Chhangte leh Lalengmawia Ralte ten inkhel bul an ṭan a, Indian football-in hriatreng tawh tur thawnthu an ziah zana Mizo tlangval pahnih an tel hi Mizo football tan chhinchhiah tlak a ni.

Lallianzuala chuan, "Champions League meuha chak chu a nuam a, result dang nen a inang lo. Inrintawkna pawh kan neih phah sawt a ni," tiin Vanglaini a hrilh.

An ṭha hret!
ISL league champion nih avanga Champions League khel Mumbai hian an match hmasa berah Al-Shabab chu 3-0 ngawtin an lo ngam lo tawh a, an mualpho.

Saudi club Al-Shabab hi Argentina tana vawi 65 inlan thei Ever Banega kawltu an ni a, foreign player ṭha piahlamah World Cup khel tur Saudi Arabia international kawl nualtu an ni a, Mumbai dem theih an ni lo.

Air Force Club-in Al-Shabab angin player langsar sawi tur an nei lo a, chutihrual chuan Iraqi club hi vawi thum ngawt AFC Cup champion ni thei an ni a, Mumbai tan chuan an la u hretah ngaih a ni.

Saudi Arabia-a inkhelah pawh Air Force lamin bul an ṭan ṭha zawk a, a tir lamah Mumbai club an talbuai - an tlawm leh ngei rinna a lian hman.

Mumbai beiseina
First half-a Air Force tana chance ṭha bera ngaih chu Hussein Jabbar-a ke bulah a tla a, mahse, Iraq international hian goal-ah a chantir thei lo - hemi hma hian Mumbai tan Diego Mauricio chuan a hun ṭha neih a chhawr bik lo.

Mahse, Mumbai-in beiseina an nei tlat - Vikram Singh-a'n chawlhlawk hmain goal khungna remchang a nei a, mahse, Lianzuala siamsak aṭanga a chance neih hi Iraq international Ahmad Ibrahim Khalaf chuan a lo dang hman.

Chawlhlawk hman a ni a, second half-ah Air Force an hlauhawm chhunzawm. Iraqi club tan Sharif Abdul-Kadhim-a'n a chance ṭha a chhawr loh hnuah Hammadi Ahmed leh Mohammed Ali te an in one-two a, Ahmed hian a hmawr bawkin goal a khung.

Kum 32 mi striker hi Iraq tana vawi 40 inlan thei a ni a, kum 2016 khan Asian Footballer of the Year thlannaah pahnihna dinhmun hial a lo luah tawh.

Comeback
Tawnhriat nei leh team ṭha zawk lakah Mumbai-in goal an chhuah hmasa a, beidawn phah nan erawh hman an tum lo. Minute 70-naah Ali Kazem chuan Mauricio a ti tlu a, penalty a chawi.

Brazilian striker Mauricio hi a lo pen chhuak a, ama penalty hlawhchhuah ngei chu harsatna nei loin goal-ah a chantir - Mumbai an phur sawt.

Air Force an insiamṭha hman lo. Mumbai-in si phurh an sut aṭanga minute ngana lekah Rahul Bheke chuan a khung ve leh a, Ahmed Jahouh siamsak a ni - Bheke hi Indian player zinga AFC Champions League-a goal khung hmasa ber a ni.

Air Force lamin hun tawp thlengin si phurh sutna tur goal an nei thei lo a, Mumbai an chak - Ningani zan dar 10:45-ah UAE club Al Jazira an hmachhawn leh ang. Inkhel hi Star Sports 3-ah a en theih a, online hmangin Hotstar VIP leh JioTV-ah a en theih bawk.

Round of 16?
AFC Champions League group stage-ah team 39 chin an inel a, group 10-ah team pali zel awmin ṭhen hran an ni a, group J aṭangin Shanghai Port an inhnuhdawh avangin team 40 tur kha 39 an ni.

Group tina hmahruaitu ṭheuhin last 16 an lut dawn a, pahnihna zinga ti ṭha tan chance a awm bawk - pahnihna te hi west region leh east region-ah ṭhen ve ve an ni a, region pahnih aṭangin pahnihna ti ṭha pathum ve vein last 16 an lut dawn.

Lianzuala chuan, "Beisei tih san viau chu a harsa a, chance erawh kan nei. Kan group aṭang chuan Al-Shabab hi an chance a ṭha berah ka ngai a, keini pawhin chance kan nei," a ti a, last 16 khelh a beisei thu Vanglaini a hrilh.

Lunglei tlangval hian Apuia nen CL match hnih an khelhah bul an ṭan ve ve a, Lianzuala chuan, "Pathian zarah ka khel pangngai viauin ka hria a, mahse, hmasawnna tur erawh ka la ngah hle," a ti a, ram dang team nena an inthlauhna sawiin, "Pianphung leh tharum a ni ber a, thutlukna siam kawngah kan la tluk lo bawk," tiin Vanglaini a hrilh.