Nadal dinhmun a la chiang lo

Rafael Nadal hliam a la dam lo a, engtik hunah nge a lo kir dawn a la hriat loh. Tun thlaa khelh tur Barcelona Open aṭangin a inhnukdawk a, clay court season a hmang ṭan har dawn hle.

Grand Slam vawi 21 champion tawh Nadal hi thla hmasa khan a inhliam, chawlhkar ruk aṭanga kar riat vel chawl tura tih a ni. May thla chawhnu lama khelh tur French Open atan chuan dam hman tura beisei a ni thung.

Nadal-a team chuan thuchhuah siamin, "Rafa chu Barcelona Open aṭangin a inhnukdawk, a hun tak la hre thei lo mah ila a lo kir thuai kan beisei," tiin a sawi.

Tun kar chhungin Monte Carlo Open an khel mek, clay court season an hmang ṭan tawh a ni. French Open ṭan hmain Madrid leh Rome Open khelh tur a awm bawk ang.