Kan ṭhatna turin thil kan ti - Arteta

Arsenal manager Mikel Arteta chuan January thlaa player an hralh chungchang a sawi a, player leh club tana thil ṭha zawk tur nia an hriat anga thil ti an nih thu a sawi.

Thlasik bazarah khan Gunners hian Pierre-Emerick Aubameyang, Ainsley Maitland-Niles, Pablo Mari, Calum Chambers, Sead Kolasinac leh Folarin Balogun te an chhuahtir.

Player tawnhriat nei an chhuahtir nual a, mahse thlasik bazar bikah hian lakluh thar an nei lo thung. Tunah hliam vangin Takehiro Tomiyasu, Kieran Tierney leh Thomas Partey te an chân mek.

Tlarhnung sira khel tur an tlachham a, midfielder Granit Xhaka an pawh hnun a ngai hial. An match hnuhnung pahnihah an tlarhnung phui lo vangin Crystal Palace leh Brighton lakah an tlawm.

Arteta chuan, "Player ṭhenkhat kan chhawr rim loh an awm, an khelh zat pawh sawi vek a harsa. Thil thleng thei hrang hrang a awm, chuta ṭang chuan club leh player tana ṭha turin thu kan ti tlu," a ti.

North London club hi Premier League-ah pangana an ni mek, match 30 aṭangin point 54 an hmu. Champions League khel phak china awm Tottenham nen an point hmuh a inzat mek.

Spanish manager chuan sawi zawmin, "Player 22 bakah goalkeeper pathum kan nei, inkhel khawp chu kan nei chiang a ni. Chutihrualin vanduai leh harsatna chu thleng thei a ni ve bawk, season tawp thlengin kan bei zui ang," a ti.

Season thara UCL khel phak turin beiseina an la nei a, chutihrualin an kuta awm a ni tawh lo. North London derby khelh hmabak an la nei a, league an khelh leh tur apiang hi an tan chuan final anga pawimawh vek a ni tawh.

Inrinni zanah Arsenal hian Southampton an lenchilh dawn. Saints hi Chelsea laka goal ruk chhuah hlim an ni a, manager Arteta nauten khualmual aṭanga point thum hlawhchhuah an tum ang.