Chawlh ka la tum lo - Ramos

Sergio Ramos chuan inkhelh chawlhsan mai a la tum lo, a kum tam deuh tawh mah se kum li emaw kum nga emaw thleng pawhin a la inkhelh theih a beisei thu a sawi.

Spanish defender hian nikum July thla khan Paris Saint-Germain a zawm. Hliam a neih avangin Paris club tan hian a inlan tam tawk lo, tun hnaiah erawh a hliam dam tawhin match hnuhnung pahnihah a zawnin a inlan.

Kum 36 mi Ramos chuan, "Chona dang ka hmachhawn hmain, football inelna sangah hian kum li chhung vel chu khelh leh phawt ka la duh. PSG tan season hnih daih contract ka ziak a, a aia tam pawh kan tum ang.

"Ka taksa hriselna dinhmun a ṭhat chhung chuan ka bei zel dawn a, rilru pawhin a cho," tiin a sawi. Season tir lamah thla nga chhung inkhel thei lo mah se, season tawp lamah chuan ṭha takin a khel chho thei dawn niin a lang.