Commonwealth Games thleng tur Victoria

Australia rama state pakhat Victoria chu Commonwealth Games 2026 thleng tura thlan fel a ni. Australia ramin Commonwealth Games vawi ruk a thlenna a ni dawn a, state malin a thlen vawi khatna a ni ang.

Commonwealth Games 2026 hi Victoria state chhunga khawpui hrang hrangah neih a ni dawn, khawpui zingah hian Melbourne pawh a tel ang, kumin aṭangin inbuatsaihna hi neih nghal tur a ni dawn.

Commonwealth Games Federation (CGF) president Dame Louise Martin chuan, "Victoria-in 2026 Commonwealth Games a thleng thei tur hi Commonwealth Games Federation chu a lawm hle, infiamna hunpui lian hi hlawhtling taka neih theih ngei pawh kan beisei," tiin a sawi.

Inelna hnuhnung ber kha Gold Coast, Australia-ah neih a ni a, kuminah hian July 28 aṭanga August 8 chhungin Birmingham, England-ah neih a ni thung ang.