A thiam zinga thiam ber Medvedev!

Daniil Medvedev chuan US Open champion Dominic Thiem chu 4-6, 7-6(2), 6-4 a hnehin ATP Finals 2020 nomawi a chawi, tennis a khelh hun chhunga a title lak ropui ber hlawh chhuak tur hian darkar hnih leh minute 43 hun a hmang.

Russian tlangval hian final kalkawngah world number 1 Novak Djokovic leh number 2 Rafael Nadal a hneh thei a, a thiam pariat chin inelnaah hian match nga a khelhah hnehna chang vekin chungnung ber nih a phu hle.

Djokovic-a'n champion hnem ber Roger Federer (6 titles) record nihrual a tumna chu a thlawn rih a, Grand Slam vawi 20 champion tawh Nadal pawhin nomawi a la chawi ngai loh lak a tumna chu boruakah a zamral rih - Medvedev leh Thiem hi season tharah pawh en bik tham an ni dawn.

Pathianni zan khan O2 Arena, London khawpuiah final khelh niin player pahnih an inkhel tawk hle. World number 3 Thiem-a'n set khatna a la a, set hnihna tie break an khelh lai pawhin a dinhmun a ṭha zawk hman.

Mahse, Medvedev-a'n a zawna point sarih ngawt hmu letin set hnihna a la a, set hnuhnung berah pawh a service hum zuiin a vannei zawkah a ṭang chhunzawm, world number 4 ni chungin season a khar thei dawn tihna a ni.

Kum 2009 khan Nikolay Davydenko chuan ATP Finals nomawi hi a lo chawi tawh, ani hnuah chuan Medvedev hi Russian player zinga mipa tennis season kharna tournament a hlawhtling leh thei hmasa ber a ni hial.

ATP Finals hi kumin bak chu London khawpuiah an khel tawh dawn rih lo, season tharah chuan Italy rama khawpui pakhat Turin-ah inelna an nei tawh ang. Kuminah hian coronavirus vangin a hmunah entu an awm thei lo.

Medvedev chuan, "Tournament kan khelh ṭan hma khan ti hian ka sawi ṭhin. London khawpuiah hian 2009 aṭangin ATP Finals khelh a ni a, champion hmasa ber chu Russian player a ni, tunah a hun hnuhnungah Russian mi bawkin hlawhtlinna ka chang leh a nih chuan a mak ngawt ang, ka ti ṭhin.

"Tunah chuan ka thu sawi lawk leh duhthusam chu a takin a thleng dik ta. Nikolay Davydenko kha ka player entawn leh ngaihsan tak a ni a, a hnung ka zui thei hi ka lawm takzet," tiin a sawi.

Chak lo Thiem tan season hmawr bawkna duhthusam a ni lo, chutih rualin kumin a hman danah erawh lawmna tur a tam. Austrian star hian Grand Slam title hmasa ber turin US Open nomawi a chawi a. ATP Finals-ah pawh player hmuhnawm ber zinga mi a ni.

Kum 27 mi Thiem hian tun hma lama a hneh theih ngai loh Nadal a hneh thei tih a lantir a, hard court hmangthiam Djokovic ngei pawh a ngam - season tharah chuan player langsar dang te tan pawh Thiem hi enpui hautak a ni ngei ang.