Barca tan beisei a la awm?

Spanish champion Barcelona-in league match hnih chhung a zawna hnehna an chan zawh loh hnuin Pathianni zan khan Villarreal chu 4-1 in an sawp a, Catalan club an phur thar ve leh ta.

Barcelona khawpuia innghat chanchinbu lar Mundo Deportivo chuan, "Barcelona an la tlawm lo," tiin phek hma berah an khaw club chanchin an ziak kulh a, champion lawm an la beisei. Hriat tel tur erawh Barcelona hian match li khelh tur an la neihah point liin Real Madrid an la phak lo mek a, champion tur chuan an elpui Madrid chetsual an chan tel a ngai. 

Barcelona hian zanin dar 1:30-ah league match khelh tur an nei a, Catalan derby-ah Espanyol an hmachhawn dawn - club pahnih hian chak an mamawh dun hle. Team 20 inelna La Liga-ah Espanyol hi 20-na an ni mek a, tun season-a match 34 an khelh tawha vawi nga chiah la chak ve team hi Barca lakah an tlawm a nih chuan La Liga inhamtan beiseina a thamral ti tih tawh ang. 

Hetiang boruak karah hian Barcelona-in champion turin chak ngei ngei an mamawh tih hriat tel a ṭha a, team pahnih beisei hi an hma hun thui taka hriltu tur a nih avangin zanin inkhel hi a hmuhnawm loh ring suh. 

Team talbuai Barcelona-in Villarreal an hneh ṭumin fan-ten an hmuh châk em em an hmu a, Luis Suarez, Antoine Griezmann leh Lionel Messi te inkawp lai an hmuh duh ang takin an hmu. Tlarhma pathum hian an khelh ho fuh ṭum chuan eng team tlarhnung pawh ṭhiat turin an ṭha tawk tih an pholang -  Griezmann leh Suarez ten goal an khung a, Messi ke aṭanga chhuak ve ve a ni. 

Villarreal laka player pathum inkawp en chuan Barca coach Quique Setien-a'n tun hnaia a chhawr mumal duh loh Griezmann hi bench-ah a dah ngam a rinawm tawh lo a, bench-ah a dah nawn a, an chak zo lo a nih ngat chuan, "Mahni thlan lai," tia sawi theih a ni ang. 

Barca team tan chak chho zel tura pawimawh ber chu a chhehvel boruak intihbuai tir loh a ni ang. Club president Josep Maria Bartomeu-a'n sawisel a tawk nasa a, Messi chu Bartomeu duh lo zingah hian a tel nia sawi a ni. 

Messi hi kum 2021-ah a contract a tawp dawn a, chhuak tur anga sawi thawm a awm - nakkumah Barca President thlanna neih a ni dawn a, he thu leng vak hi Messi-a'n Bartomeu tlak theih nana a ruahman niin ṭhenkhat chuan an sawi.

Hetihlai hian Setien thlaktu tura sawi Xavi chuan Al-Saad-ah contract thar ziak mah se Barca-in an sawm a nih chuan a duh huna a zawm theihna dan a ziak tel nia sawi a awm bawk - thil chiang lo tam takin Barca chhungkua a tibuai a, tuna thil chiang awmchhun chu 'chak an mamawh' tih hi a ni. 

Thawhṭanni zan La Liga inkhel pawimawhah Sevilla chuan 1-0 a Eibar an hneh avangin Champions League khelh an beiseina a nung ve zel a, table-ah palina an nih chhunzawm zel. Sevilla goal awmchhun hi tunlai striker 'hot' Lucas Ocampos-a'n minute 56-naa a khung a ni a, tun season La Liga-a a goal 13-na a ni - hei mai hi a ni lo, goalkeeper Tomas Vaclik a inhliam a, substitution an hman zawh avangin Ocampos hi a keeper zui.

Hun tawp hnaih tawh lama 'throw-in' aṭangin Sevilla goal lama tlan lut Eibar goalkeeper Marko Dmitrovic chuan hun ṭha a nei a, Ocampos hian ṭha zetin a dang bawk! La Liga inkhel dangah Real Sociedad chuan 1-1 in Levante an inhnehtawkpui a, Champions League khelh beiseina a tlem ta hle. 

July 6, Thawhṭanni Zan

Levante    1 - 1    Real Sociedad

LEV: José Luis Morales 16'

RES: Alexander Isak 12'

Sevilla    1 - 0    Eibar

SEV: Lucas Ocampos 56'

Zanin Inkhel Tur

Real Betis    12:00 AM    Osasuna

Getafe    12:00 AM    Villarreal

Barcelona    01:30 AM    Espanyol