Ibra awmna Milan an sang zel

Zlatan Ibrahimovic goal hnih hmangin AC Milan chuan an elpui Napoli 3-1 in an luhchhuah a, Serie A hmahruaitu an nihna an sawhnghet zel. Stefano Pioli naute hian point 20 neiin, an hnuaiah point 18 neitu Sassuolo an awm.

Pathianni zan Serie A inkhel dangah Inter Milan pawhin an mikhual Torino 4-2 in an hneh. Inter tan hian Manchester United striker hlui Romelu Lukaku leh Alexis Sanchez ten goal khungin an team an chakpui.

Stadio San Paolo a inkhelah Ibrahimovic a langsar ber, minute 20-naah goal hmahruai a tauh lut. Swede striker palian hian second half tir lamah Ante Rebic-a cross chu laklawh nei miah loin a khupin a do lut bawk.

An mualah Lazio an mualpho dawn niin a lang, mahse Dries Mertens chuan box chhunga a ball chan chu rang takin a vir pui a, amah vengtu defender Alessio Romagnoli chu chiang zeta bumin an si purh a sut ṭhen.

Gennaro Gattuso naute an phur thar, amaherawhchu goal an neih aṭanga minute hnih hnu lekah midfielder Tiemoue Bakayoko chu ṭul lo taka yellow card vawi hnihna a hmuh vangin hnawhchhuah a ni a, an beiseina a tlahniam nghal bawk.

Hliam vangin Ibra lak chhuah a ngai a, hliam na tak niin a lang lo thung. Hun tawp dawnah Norway winger Jens Petter Hauge chuan Milan chak nemnghehna khungin khualmualah point thum hlu tak an hmu.

AC Milan coach Stefano Pioli chu hri a kai avangin a naute inkhel a kaihruai thei lo a, TV lam aṭanga a lo en a ngai. Poili hmun ruak luah turin assistant coach Daniele Bonera a rawn pen chhuak a, a mawhphurhna chu ṭha takin a hlen.

Bonera chuan, "Hmahruaitu nih hi chu duhthusam a ni, a pawimawh zawk erawh engtiang chena rei nge kan awm theih tih a ni. Tunah hian match riat chauh kan la khel a, keini aia sum hmang hnem leh team nghet zawk nena inel kan ni, tih hriat a ngai," a ti.

Kum 39 mi Ibra chungchang sawi zuiin Bonera chuan, "A dinhmun dik tak ka la sawi thei lo, a malpui kha na a tih avangin vurin kan dep. Hun rei lote hnuah a chanchin kimchang kan sawi thei ang," tiin a sawi.

Ibra hian tun season Serie A match ruk a khelh aṭangin goal 10 a khung der tawh. Goal khung a la thiam reng a, goal khung hnem lamah Cristiano Ronaldo (8 goals) nen na takin an inel ngei dawn niin a lang - Italian football tingaihnawm zualtu an ni ang.

Manchester United tana beisei phak lo Lukaku leh Sanchez ten Inter Milan an chhanhim. Belgium international striker hian goal hnih a khung bakah Sanchez khung tur a siamsak a, a goal pakhat hi Sanchez siamsak a ni ve thung.

Inter chak mah se manager Antonio Conte a lawm lo. Conte naute hian goal an khung ve hmain Torino tan Simone Zaza leh Cristian Ansaldi ten an khung hmasa zawk a, goal hnih phurh hnuah harsa takin a tho chhuak.

Conte chuan, "Inpekna, tihtakzetna leh chak duha tuihalna ang kha ka hmu leh duh, season hmasa khan chutiang chu kan nei. Kan khelh danah leh kalphungah nasa takin hma kan sawn ngei a, chutihrualin hmasawnna tur erawh a la tam hle," a ti.

Inkhel dangah AS Roma chuan an mikhual Parma 3-0 in an hneh a, beisei phak baka season bul ṭan fuh Sassuolo pawh Hellas Verona mualah 2-0 in an chak. Tun season Serie A match riat khelh tawh chinah Crotone chauh chu chak ni hmel la hmu lo niin, a hniam berah an awm.