Team huaisen Chelsea an tla

Chelsea boss Thomas Tuchel-a'n, "Santiago Bernabeu-a comeback tur chuan thawnthu ngaihnawm tak kan mamawh a ni," tiin a sawi a, Real Madrid lehthal turin thil mak danglam a thlen a ngaih thu a sawi.

Team huaisen Chelsea-in thawnthu ngaihnawm tak, sawi reng tawh tur min chhawpsak ta ngei a, mahse, an beisei anga semifinal hruai thlengtu atan erawh a tawk zo lo.

Thawhlehni zan khan Champions League quarterfinal second leg-ah Chelsea-in Real Madrid an lenchilh a, first leg-ah 3-1 a an lo ngam tawh loh avangin fans tam zawk tan beisei tih san a harsa.

Chelsea-in thil ropui an lantir a, minute 75 chhungin Mason Mount, Antonio Rudiger leh Timo Werner ten goal an khung a, 3-0 a ni. Mahse, Blues an chesual zeuh a, Real-in Rodrygo leh Karim Benzema hmangin an hrem nghal a, 3-2 in tlawm mah se inkhel pahnih belhkhawmah 5-4 a chakin an tlang.

Hei le Chelsea
Stamford Bridge-ah Benzema-a'n hattrick a siam a, mahni mualah ngei Chelsea an mualpho a, 3-1 in an tlawm - khualmualah beiseina nei turin goal hnih tal khung a ngai a, Bernabeu-a inkhel tur an nih avangin theih loh tluk a ni.

Mahse, Chelsea-in ngaihdan dang an nei a, theih loh anga lang kha tih theih a ni tih lantir an duh. Minute 15-na lekah Mount chuan goal a rawn khung nghal a, a finishing a tawih hle.

Goal dang lut loin chawlhlawk hman a ni a, second half-ah pawh tha tho zawk chu Blues an ni. Minute 51-naah goal khungtu Mount chu goal siamsaktuah a ṭang a, corner aṭanga a ball thlawh luh chu Rudiger chuan ṭha zetin a tauh lut.

Chelsea-in beiseina an nei thar a, an la duhtawk lo cheu - London club a pan hnua sawiselna tawk nasa tak Werner a inlar a, German striker hian theihna sang tak a nei tih pholangin goal ṭha bik a khung.

A hunah tak
Bernabeu-ah Chelsea-in goal thum an khung a, Real an mualpho - mahse, team 'class' sang na na na chuan ball tawh vawi khat leka inkhel thlak danglam thei player an kawl ṭhin a, Real an danglam lo.

Real-in an goal thumna an chhuah aṭanga minute nganaah Luka Modric a inlar a, Croatian midfielder hian mawi lutukin Rodrygo tan a siamsak a, kum 21 mi midfielder hian goal-ah a chantir.

Madrid khaw club-in goal an khung hian 3-1 a ni chiah a, inkhel hmasa nena belhkhawmin chak zawk an awm lo - minute 90 thlengin goal dang a lut lo a, extra time an khel zui.

Minute 96-naah first leg-a Chelsea veltu Benzema a inlar a, Chelsea-in French striker ṭha mi hi goal bulah ven lohin an dah! Blues tlarhnungin an chetsual an tuar a, Vinícius Júnior-a siamsak chu Benzema hian a tauh lut a, Chelsea veltu chu Benzema bawk a ni.

Blues an vanduai
Chelsea-in Santiago Bernabeu-ah inkhel hmuhnawm an pho chhuak a, semifinal luh phu khawpin an khel - mahse, football-ah vanduai zawk awm a ṭul a, Real zawkin semifinal an lut ta.

Blues-in 2-0 a hma an hruai laiin Marcos Alonso chuan goal a khungah a inngai a, mahse, video assistant referee hmanga ennawn a nih hnuah handball vangin pawmsak a ni lo.

Alonso hi ennawn chuan a handball lo niin a lang a, inhnial theihna tak a ni. Chutihrual chuan Chelsea tlang loh chhanah vanduaina puh vek a rem bik lo a, Real an class a sang tih a lang nawn - Benzema'n goal a khung bakah bar a tauh per bawk.

Blues-in Pathianni zanah FA Cup semifinal khelin Crystal Palace an mikhual dawn a, UEFA Super Cup leh FIFA Club World Cup nomawi an chawi tih lohah chuan tun season atana an beisei theih tur nomawi a ni tawh - Real erawh La Liga-ah pawh point 12-in an sang fal mek.

Champions League Quarterfinal

First Leg
April 5, Thawhlehni Zan
Manchester City 1 - 0 Atletico Madrid
MAN: Kevin De Bruyne 70'
Benfica 1 - 3 Liverpool
BEN: Darwin Nunez 49'
LIV: Ibrahima Konate 17'; Sadio Mane 34'; Luis Diaz 87'
April 6, Nilaini Zan
Villarreal 0 - 1 Bayern Munich
VIL: Arnaut Danjuma 8'
Chelsea 1 - 3 Real Madrid
CHE: Kai Havertz 40'
REA: Karim Benzema 21', 24', 46'

Second Leg
April 12, Thawhlehni Zan
Bayern Munich 1 - 1 Villarreal
BAY: Robert Lewandowski 52'
VIL: Samuel Chukwueze 88'
*Inkhel pahnih belhkhawmah 2-1 in Villarreal an chak
Real Madrid 2 - 3 Chelsea
REA: Mason Mount 15'; Antonio Rudiger 51'; Timo Werner 75'
CHE: Rodrygo 80'; Karim Benzema 96'
*Inkhel pahnih belhkhawmah 5-4 in Real an tlang
Nizan Inkhel (Result kan hre hman lo)
Atletico Madrid 12:30 AM Manchester City
Liverpool 12:30 AM Benfica