Man United leh Erik ten Hag te an inrem

Manchester United chuan manager nghet ni turin Erik ten Hag nen a thu phungin inremna an nei niin khawthlang media-ten an tarlang. Dutch manager Ten Hag hi Old Trafford-ah kum li daih contract ziak tura ngaih a ni.

Inremna hi ṭawngkaa inremna chauh nia hriat a ni a, Man United leh Dutch manager chhawrtu Ajax ten inremna an la nei lo. English club leh Ten Hag aiawh Sports Entertaiment Group (SEG) ten inremna chungchangah thuchhuah an nei lo.

Ajax hian April 17 hian Dutch Cup final-ah PSV Eindhoven an hmachhawn dawn a, hemi hma hian inremna ziah a ni lo ang. Ten Hag hian Ralf Rangnick a thlak dawn a, German manager hian nikum November thlaa Ole Gunnar Solskjaer an ban hnuah manager lailawk hna a chelh.

Man United manager nghet tur hian Mauricio Pochettino pawh sawirik a ni a, amaherawhchu Argentine manager hi Paris Saint-Germain-ah beisei a phak tawk loh avangin Dutch manager hi a buk a rit ta zawk.

Kum 52 mi Ten Hag hian kum 2012 khan Go Ahead Eagles a enkawl hnuin kum 2013 khan FC Bayern Munich II a kaihruai a, Bayern reserve team hi 2013-14 season khan Regionalliga Bayern-ah a champion pui.

Bayern reserve team zawh hian Dutch club FC Utrecht a enkawl a, hming a chherna tak erawh Ajax a ni. December 28, 2017 aṭangin Ajax hi a enkawl ṭan a, Eredivisie leh KNVB Cup-ah vawi hnih ve ve a champion tawh a, 2018-19 season khan Champions League final a hruai thleng - tun season-ah nomawi pahnih belhchhah thei dinhmunah a ding mek.