Match hmasa berah Djokovic a tla

Novak Djokovic chu Monte Carlo Masters-a a match hmasa berah a chak lo. Serbian star hi Alejandro Davidovich Fokina hneh loin a zinkawng a tawp a, tun hnaia match a khelh tam tawk loh chu a tuar tih a lang chiang hle.

Spanish tlangval Fokina hian world number 1 service hi vawi kua ngawt a chhuhsak thei. Thawhlehni zan inkhel hmuhnawmah Novak hi 6-3, 6-7 (5-7), 6-1 in a chak lo, set hnuhnung berah a che chhe zual.

Kum 2018 khan Dubai Championship-ah Djokovic hi a match hmasa berah a lo tla tawh, a hnu lamah chuan tun ṭum hi match hmasa bera a tlak lehna hmasa ber a ni hial, a tan season a la inher fuh thei lo.

World number 46 Davidovich Fokina chuan, "Ka naupan lai chuan Nole inkhel hi ka en ṭhin a, ka ngaisang takzet. Tun season-ah a la inkhelh tam loh avangin inrintawkna a nei tlem tih ka hre thei a, ka vanneih phah," a ti.

Hripui laka invenna a lak duh loh avangin Djokovic hi kuminah a inkhel tam lo. Australian Open a khel thei lo a, thla hmasa khan United States lamah Indian Wells leh Miami Open pawh a khel thei lo, tunah clay court aṭangin season pangngai bul a ṭan ve chauh anga sawi theih a ni.

Kum 22 mi Davidovich Fokina hian a match hmasa zawkah Marcos Giron chu straight set hmangin a lo hneh tawh, tunah chuan seeded pakhatna meuh a hneh theih avangin inrintawkna a nei sang tawh khawp ang.

Monte Carlo Open champion lai Stefanos Tsitsipas chu round hmasa berah a bye a, seeded pathumna pek niin a match hmasa atan 2019 champion Fabio Fognini nen an inkhel ang a, player ṭha Grigor Dimitrov pawhin Dusan Lajovic a tum dawn.