Bremen-in Bundesliga khel zel dawn

8th July, 2020

Werder Bremen chuan season thara Bundesliga khel chhunzawm turin Thawhṭanni zan khan Bundesliga 2 club Heidenheim nen 2-2 in a inhnehtawk pui a, away goal rule hmangin Germany rama football inelna sang berah an khel chhunzawm ang.

First leg hi Weser-stadion-ah kar liam ta khan khelh a ni a, team nem zawk tura ngaih Heidenheim-in mual neitu Bremen chu goal awm loin an chelh. Hei chauh hi ni loin Bremen captain Niklas Moisander chu hnawhchhuah a ni a, second leg-ah a inlan thei lo.

Thawhṭanni zan second leg hi Voith Arena-ah khelh a ni a, kum 173-a upa club Heidenheim-in a vawi khat nana Bundesliga khel turin beiseina sang tak an nei. Amaherawhchu Bremen zawkin bul ṭan ṭha a, Heidenheim player Norman Theuerkauf-a'n minute thumna lekah an lamah mak deuhin a ti lut.

Goal dang hmuh tur a awm lawk lo a, minute 85-naah Heidenheim player Tobias Mohr-a'n box pawn aṭangin kawh zetin crossbar a pet per a, hemi per let hi Tim Kleindienst-a'n siphurh sut nan a hmang. Inkhel boruak a dang nghal vek. Bremen an hlauhthawng a, Heidenheim-in chakna goal khung tumin an nawr chiam. Bundesliga club-in counter attack an hmang ṭangkai a, Fin Bartels thawhrah sengin goal ruakah Ludwig Augustinsson-a'n hun pek belh minute linaah a khung.

Bremen-in Bundesliga ticket neiah an inngai a, amaherawhchu an ngaih ang ngawt chuan an la awlsam lo. Injury time minute riatnaah Kleindienst-a'n penalty hmangin a vawi hnih nan siphurh a sut a, chakna goal khungna tur erawhin hun an nei tawh lo. Werder Bremen squad-ah hian Claudio Pizarro a awm a, Peruvian forward hi kum 41 mi a nih tawh avangin football boot a khai ve tawh dawn. Pizarro hian Bayern Munich leh Chelsea tan khel ve bawk mah se Bremen tan legend a ni pha tho a, club tana goal khung tam ber a ni.

Bundesliga khelh zawh tak aṭangin 17-na Fortuna Dusseldorf leh 18-na SC Paderborn te an relegate a, 16-na Werder Bremen erawh playoff hmangin an inhamtang. 2. Bundesliga champion Arminia Bielefeld leh pahnihna VfB Stuttgart ten season tharah club pahnih Dusseldorf leh Paderborn te ai awhin Bundesliga an khel ang.