Europa League ; Semifinal lut thei vek an la ni

Barcelona leh Eintracht Frankfurt te Nou Camp-ah an intawng dawn a, inkhel hmasaah 1-1 a an inhnehtawk avangin tlang tur zawk a la chiang lo. Away goal rule a awm tawh loh avangin dinhmun ṭha zawk tia sawi tur an awm bik lo.

West Ham, Atalanta, RB Leipzig, Lyon leh Rangers te pawhin semifinal beiseina an la nei vek. Rangers hi Sporting Braga lakah 1-0 a chak lo lai an ni thung a, tlang tur chuan goal khat aia tam an khung ngei a ngai dawn thung.

Goal mamawh Barca
Xavi-a'n a din thar leh hnuah Barcelona hian goal khung an harsat lo. Mahse, Deutsche Bank Park-a an inkhelh ṭumin goal khung an harsat teh tlat, hun tawp lam minute 10 chhung phei chu player pakhata tam zawk chungin an khel, goal erawh an neih belh thei chuang lo.

Inelna hrang hrangah match 15 chhung tlawm nei loin Barca an kaltluang mek, vawi 11 hnehna changin ṭum li chu an khingpuite nen an inhnehtawk. Zaninah chuan inhnehtawk a awm thei dawn lo, chak emaw chak lo emaw nih a ngai dawn.

Pierre-Emerik Aubameyang, Ferran Torres leh Ousmane Dembele te an inkawp leh dawn, goal khung chu an harsat lo tura ngaih a ni. Mipui ngaihven erawh Pedri a ni leh dawn, Spanish midfielder hi inkhel tinungtu bakah goal khung thiam a ni bawk.

Kum 19 mi chauh la ni mah se Pedri hi a puitling tawh, club leh ram tan rinrawl a nih phak miau avangin a kum hi teh nan a remchang lo. A thiamna leh finna te hi Europa League semifinal-a Barca hruai thleng turin a tling tawk em, tih chu zaninah fiah a ni ang.

Hammers beiseina
David Moyes-a hoin West Ham hian an beisei phak bak ram an dai mek a, kir leh mai an duh tawh lo. London club hian semifinal thleng tur erawh chuan hna hautak an thawh a ngai dawn, European football huanga sulhnu ngah zawk Lyon luhchhuah chu a awlsam dawn lo.

Premier League club hian hliam vangin Angelo Ogbonna an chhawr thei dawn lo a, a bak chu harsatna lian tham nei an awm lo. Defender Kurt Zouma dinhmun a chiang lo deuh bawk a, ani erawh match pawimawh a nih avangin a inlan a rinawm.

Lyon erawh hliam vangin an buai viau. Thiago Mendes, Maxence Caqueret, Sinaly Diomande, Mathis Rayan Cherki leh Lenny Pintor te an inhliam a, kartawp inkhelah Tanguy Ndombele, Houssem Aouar leh Antony Lopes ten hliam tenau an tuar bawk.

Ligue 1 club hian an ṭhat dan berin West Ham an mikhual thei dawn lo tih chu a chiang tawh. Chutihrualin Hammers pawh hi an match hnuhnung berah Brentford hmaah 2-0 in an chak lo, khualmuala hnehna chang tur chuan thapui an thawh a ngai ngei ang.

Gasperini a inringtawk
Atalanta manager Gian Piero Gasperini chuan Europa League an khelh chhoh danah a naute a chhuang a, zaninah pawh hnehna chang thei tura an inpeih thu a sawi. Zan dar 10:15-ah RB Leipzig an mikhual ang.

RB Leipzig muala an inkhelh ṭum khan Italian club hian hnehna an chang teuh hle, second half-ah Davide Zappacosta-a'n anmahni lama a tih luh palh vangin 1-1 in an inhnehtawk hram, zaninah chuan chak zawk tura rinkai an ni.

Gasperini chuan, "Second leg hi chu a hma aiin a pawimawh dawn, a chhan chu inhnehtawk a awm theih tawh loh vang a ni. RB Leipzig hi team ṭha leh khelh dan phung nghet tak nei an ni, kan chak tawk lohna lai an hre thei hle bawk.

"Team ṭha hmachhawn turin kan inbuatsaih a, hamrik hnunhnung a rik huna lawm zawk kan nih ngei ka beisei," a ti. Atalanta hian attacking game hmuhnawm an khel ṭhin, goal venhim ngai pawimawh mah se a khung an tum nasa zawkin a rinawm.

Europa League Quarterfinal
Second Leg - Zanin Inkhel Tur
Atalanta 10:15 PM RB Leipzig
Lyon 12:30 AM West Ham
Barcelona 12:30 AM Eintracht Frankfurt
Rangers 12:30 AM Braga

First Leg - April 7, Ningani zan
RB Leipzig 1 - 1 Atalanta
RBL: Davide Zappacota 58' (OG)
ATA: Luis Muriel 17'
Eintracht Frankfurt 1 - 1 Barcelona
FRA: Ansgar Knauff 48'
BAR: Ferran Torres 66'
West Ham United 1 - 1 Lyon
WHU: Jarrod Bowen 52'
LYO: Tanguy Ndombele 66'
Sporting Braga 1 - 0 Rangers
SPO: Abel Ruiz 40'