Celtics hmachhawn tur Nets

Brooklyn Nets chuan nimin khan NBA regular season bika an match khel tur an khel zo a, an khingpui Cleveland Cavaliers chu 115-108 a hnehin hnu an khar ṭha hle.

Eastern Conference table-ah Nets hi pasarihna an ni a, playoff-ah chuan pahnihna Boston Celtics nen an inkhel ang. Chak lo Cavs chu pariatna an nih avangin hmahruaitu Miami Heat an hmachhawn a ngai dawn.

Nimin zing inkhelah Nets tan Kyrie Irving a che ṭha, shot vawi 12 zet neiin point 34 a hlawh chhuak. Irving hian 2019 khan Nets hi a zawm, kuminah hian NBA champion nih pui a tum ruh hle.

Nets coach Steve Nash chuan, "Kan hmaa ding tur chu tute nge tih ai chuan, kan ṭhat dan berin kan khel chhuak em, tih a pawimawh zawk. Chuvangin playoff-ah chuan tihsual nei loa kan khelh ka duh," a ti.

Nimin zing inkhel dangah Minnesota Timberwolves chuan Los Angeles Clippers 109-104 in an hneh. Timberwolves hi Western Conference table-ah pasarihna an ni a, chak lo Clippers hi pariatna an ni thung.

Timberwolves tan point 30 neitu Anthony Edwards leh D'Angelo Russell 29 (points) te an che ṭha a, inkhel inhnehtawk taka hnehna an chan theih chhan langsar an ni.