Season tawpa chhuak tur Fernandinho

Fernandinho chuan tun season tawp rualin Manchester City chhuahsan a tum, contract thar a ziah dawn loh avangin a chawr chhuahna Brazil lamah a kir ang.

Kum 2013 khan Fernan-dinho hian Shakhtar Donetsk aṭangin Man City hi a zawm a, player pawimawh berte zinga mi a ni ṭhin. Tunah chuan kum 36 mi a ni tawh a, defensive midfielder Rodri awm hnuah hmun a chang ta meuh lo.

Brazilian midfielder Fernandinho chuan, "Inkhelh ka duh, chawlh mai ka la tum loh avangin Brazil-ah ka kir ang," tiin an rama a kir tur thu hi a tichiang a, a club zawm tur erawh a la sawi lang lo thung.

Premier League nomawi vawi li chawi tawh Fernandinho hian nikum khan kum khat daih contract a ziak. Pep Guardiola-a'n tun hnai khan a player hi la cham se a duh thu a lo sawi tawh a, a duh ang erawhin a chelh thei dawn ta lo a ni.

Tun season inelna hrang hrangah match 23 a inlan tawh a, mahse Premier League bikah vawi ruk chauh inkhel bul ṭantu zingah a la tel. Match tam zawk khelh duh tan chuan Etihad Stadium chhuahsan mai a ngai.

Thawhlehni khan Fernandinho leh Guardiola ten media an hmachhawn, journalist zawhna chhangin Fernandinho hian a chhuah tur thu a sawi. A thusawi hian Pep pawh a barakhaih viau.

Man City manager Pep chuan, "A chhuak dawn tih hi a hmain ka hre lawk lem lo, tunah ka hre ve chauh. Club tana a hnathawh tawhte hi ka hriatsak, team khaidingtu pawimawh tak a ni," tiin a player a fak.

Twitter lamah Fernandinho hian a thusawi chuangchang sawi belhin, "Press conference-naah khan ka rilru puak chhuakin zawhna kha ka chhang mai a ni. Min hre chiangtute chuan club ka zahna leh captain ka nih anga ka tihturah theihtawp ka chhuah tih an hria," a ti.