Mourinho telna ECL boruak a 'hot' leh tawh!

Europa Conference League chungah Europa League leh Champions League a la awm a, ngaihven tur zawk a tam - mahse, ECL hian Jose Mourinho enkawl AS Roma an nei miau a, an boruak a 'hot' leh tawh hle!

AS Roma hi ECL quarterfinal second leg-ah zanin dar 12:30 hian an inlan dawn a, Norwegian club Bodo/Glimt an hmachhawn dawn - first leg-ah 2-1 a an lo tlawm tawh avangin Italian club tan a awlsam dawn lo.

Zanin ECL quarterfinal inkhel tur ngaihven hlawh zual zingah Leicester City inlan tur chu a tel a, Premier League club hian PSV Eindhoven an lenchilh dawn. King Power Stadium-a an intawn hmasakah goal a lut lo a, zaninah goal khung tumin an innawr dawn.

Slavia Prague-in zanin dar 12:30-ah Feyenoord an mikhual dawn a, team pahnih hi an intawn hmasakah 3-3 in an inhnehtawk a, zanin inkhel pawh a hmuhnawm loh ring suh.

Buaina chu
Mourinho tan Bodo/Glimt tluka ninawm an awm kher lo mai thei - group stage-ah khan team pahnih hi an lo awm dun tawh a, vawi hnih an inkhelah Roma an mualpho ve ve.

An intawn hmasak berah Norwegian club hian 6-1 in AS Roma hi an sawp a, Italian club an mualpho - Roma-in an mualah phuba lak an tum a, mahse, 2-2 in an inhnehtawk.

Quarterfinal-ah team pahnih an intawng leh a, Roma an chak tawh a rinawm laiin first leg-ah 2-1 in an tlawm leh tawh. Second leg-ah phuba an la thei lo a nih chuan Mourinho tan mualphona tawpkhawk a ni ang.

First leg-a an inkhelh zawhah hian buaina a chhuak zui a, Bodo/Glimt coach Kjetil Knutsen leh Roma goalkeeping coach Nuno Santos te chu an intibuai - UEFA chuan an pahnih hian zanina mual sira inlan thei lo turin an hrem.

Mourinho a ngai reng e!
Bodo/Glimt coach Kjetil Knutsen hi Roma goalkeeping coach Nuno chu beiah puh a ni a, Knutsen hian an puhna avang hian a hna chawlhsan thlenga a ngaihtuah thu a sawi.

Roma hian kartawp Serie A match inkhelah Salernitana chu 2-1 in an hneh a, buaina an tawk leh! Roma coaching staff zinga mi chuan Salernitana lam hi ngeiawm takin a lo ṭawng khum nia sawi a ni.

Mourinho chuan, "Ka staff zinga mi pakhat chuan Salernitana kha Serie B lama an tlak tur thu sawiin a lo deusawh a, Salernitana lamah kalin ngaihdam ka dil - club leh police ṭhenkhat angin dawt ka sawi ve ngai lo," a ti zui zat - Bodo/Glimt a tih elna a ni.

Inkhelh hma hauhin team pahnih boruak a sang a, zaninah an inkhel pawh a hmuhnawm dawn - Roma tan tun season-a goal 23 khung tawhtu Tammy Abraham bawk chu innghahna tur a ni leh ang.

ECL Quarterfinal - First Leg
April 7, Ningani Zan
Feyenoord 3 - 3 Slavia Prague
FEY: Luis Sinisterra 10'; Marcos Senesi 74'; Orkun Kökçü 86'
SLA: Peter Olayinka 41'; Yira Sor 67'; Ibrahima Traoré 90+5'
Bodø/Glimt 2 - 1 AS Roma
BOD: Ulrik Saltnes 56'; Hugo Vetlesen 89'
ASR: Lorenzo Pellegrini 43'
Marseille 2 - 1 PAOK
MAR: Gerson 13', 90+4'; Dimitri Payet 45'
PAO: Omar El Kaddouri 48'
Leicester City 0 - 0 PSV Eindhoven

Quarterfinal - Second Leg
April 14, Ningani Zan
PSV Eindhoven 10:15 PM Leicester City
AS Roma 12:30 AM Bodø / Glimt
Slavia Prague 12:30 AM Feyenoord
PAOK 12:30 AM Marseille