En châkawm Dortmund inlan dawn

Zanin dar 1:30 hian Champions League group F hmahruaitu Borussia Dortmund-in Club Brugge an mikhual dawn.

German club hian kartawpah Hertha Berlin 5-2 in an sawp a, Erling Haaland-a‘n goal li ngawt a khung. Kum 20 mi Norwegian striker hian tun season inelna hrang hrangah match 12 inlan tawhin goal 15 a khung tawh a, Club Brugge lakah pawh a hmuhnawm ang.

Dortmund hian player beiseiawm rual an kawl hnem hle. Kartawp khan kum 16 leh ni khat mi Youssoufa Moukoko chuan Haaland thlakin senior team tan a inlan a, Bundesliga-a khel thei naupang ber a ni.

German club hian Haaland leh Moukoko bakah rawlthar ṭha rual Jadon Sancho, Gio Reyna leh Jude Bellingham-te an la kawl cheu. Manager Lucien Favre-a‘n dim dawi takin player naupang a hman a ṭul dawn a, Champions League squad-ah Moukoko a tel tih hriat a ṭha.