Ennawm ropui chhawptu Liverpool & City FA Cup semifinal-ah an intawng leh dawn
English football mai ni lo, European football-a team inel hmuhnawm leh ngaihnawm ber pawl thlang dawn ila, Liverpool leh Manchester City thlan tel loh chuan a kalh a kim lo ang.
Team pahnih hian tun season-ah tum ropui an nei a, kawng la indalsak thei vek an ni bawk - Reds-in quadruple champion nih an duh a, City-in treble champion nih an tum thung.
Premier League-ah team pahnihin champion an tum ve ve a, point khata inthlauin match sarih ve ve khelh tur an nei - Nilaini zan khan Champions League semifinal an lut ve ve a, zaninah FA Cup semifinal-ah an intawng dawn bawk!
Zanin dar 8:00-ah Liverpool hi City nen final luh inchuhin an inkhel dawn a, Pathianni zan dar 9:00-ah Chelsea leh Crystal Palace an inkhel dawn bawk - a hmuhnawm dawn.
Champions League phawt!
Premier League match hautakah Liverpool leh City hi intawng zo hlim an ni a, Etihad Stadium-ah 2-2 in an inhnehtawk a, chak zawk an awm lo - Champions League quarterfinal an khel zui!
Liverpool hian an mikhual Benfica chu 3-3 in an inhnehtawkpui a, Reds tana Ibrahima Konate goal hmahruai chu Goncalo Ramos chuan Benfica tan a sut.
Reds tan Roberto Firmino-a'n goal hnih khung leh mah se Roman Yaremchuk leh Darwin Nunez ten Benfica tan si phurh an sut zo a, mahse, Portuguese club hi an mualah 3-1 in an lo tlawm tawh a, inkhel pahnih belhkhawmah 6-4 in an tlawm.
Jurgen Klopp-a'n City nena an inkhelh chauh piahlamah, FA Cup semifinal an khel dawn tih hriain Virgil van Dijk, Mohamed Salah, Thiago Alcántara, Sadio Mane, Andy Robertson leh Trent Alexander-Arnold te bench-ah a dah vek tih hriat tel a ṭha.
Reds an him e
Klopp-a'n League Cup-ah Reds a champion pui tawh a, nomawi dang pathum a la beisei avangin fimkhur taka player siksawi thiam a ṭul tih a hria a, Benfica lakah 'risk' lain a chesual lo.
Hetihlai hian Benfica laka inlan Diogo Jota erawh hliam tenau a nei a, Portuguese forward hi Klopp chuan inlan tura a dam hman a beisei thu a sawi.
German coach-in zaninah an ṭhat dan berin team a rem leh thei tawh dawn a, Virgil van Dijk, Mohamed Salah, Thiago Alcántara, Sadio Mane, Andy Robertson leh Trent Alexander-Arnold te chu zaninah an rawn kir leh vek ang.
Jota awm lo pawh ni se Firmino emaw Luis Diaz chu inlan turin an la awm dawn tho a, manganna tur a awm lo - Wembley leng turin Reds an inpeih e.
City an tlang
Klopp-a'n City hmachhawn aṭanga player a thlak danglam nual laiin Pep Guardiola erawhin an ṭhat dan berin Madrid khawpuiah a team a hruai a, goal khung lo mah se first leg-a an result hmangin 1-0 in an tlang.
Wanda Metropolitano Stadium-a inkhel a hmuhnawm takzet a, Etihad-a goal venhim bak ngaihtuah lo Atletico pawhin goal khung an mamawh tih hriain an nawr na hle.
Atletico boss Diego Simeone-a'n goal nawr tura a neih ang chu a luhtir kim a, mahse, Angel Correa, Antoine Griezmann, Rodrigo de Paul, Matheus Cunha leh Luis Suarez ten chance an nei chungin an chhawr lo.
Inkhelh zawh lamah boruak a sang lehzual a, chak loh tuar thiam lo Atletico fan-te an che na zual - police inrawlh ngai hial khawpin team pahnih inkarah boruak a awm.
City an chau
Pep-a'n a squad neih ṭhat ber hmangin Atletico a hmachhawn a, Reds nen Premier League-a an intawn ṭuma player pawimawh em em Kevin De Bruyne leh Kyle Walker chu hliam vangin lakchhuah an ngai.
KDB hian a kerekah hliam a tuar a, khawthlang media-ten an tarlan dan chuan Liverpool a hmachhawn thei dawn lo. Right back Walker pawh hliam vang thoin a inlan theih loh a rinawm zawk.
Pep-a tan chuan anni pahnih inlan lo tur ringawt pawh hi lu haina tham a ni a, a player neih ṭhatte pawh an chau tel dawn bawk - Benfica laka hahdam taka khel tawh Reds lakah talbuai a awl dawn.
KDB a inlan lo a nih chuan Jack Grealish leh Raheem Sterling tan kawng hawnin a awm dawn tihna a ni ang a, tlarhnungah Walker a inlan loh chuan a hmun ruak luah turin Nathan Ake leh Oleksandr Zinchenko an awm bawk.
Champions League
Quarterfinal - First Leg
April 5, Thawhlehni Zan
Manchester City 1 - 0 Atletico Madrid
MAN: Kevin De Bruyne 70'
Benfica 1 - 3 Liverpool
BEN: Darwin Nunez 49'
LIV: Ibrahima Konate 17'; Sadio Mane 34'; Luis Diaz 87'
April 6, Nilaini Zan
Villarreal 0 - 1 Bayern Munich
VIL: Arnaut Danjuma 8'
Chelsea 1 - 3 Real Madrid
CHE: Kai Havertz 40'
REA: Karim Benzema 21', 24', 46'
Quarterfinal - Second Leg
April 12, Thawhlehni Zan
Bayern Munich 1 - 1 Villarreal
BAY: Robert Lewandowski 52'
VIL: Samuel Chukwueze 88'
*Inkhel pahnih belhkhawmah 2-1 in Villarreal an chak
Real Madrid 2 - 3 Chelsea
REA: Mason Mount 15'; Antonio Rudiger 51'; Timo Werner 75'
CHE: Rodrygo 80'; Karim Benzema 96'
*Inkhel pahnih belhkhawmah 5-4 in Real an tlang
April 13, Nilaini Zan
Atletico Madrid 0 - 0 Manchester City
*Inkhel pahnih belhkhawmah 1-0 in City an tlang
Liverpool 3 - 3 Benfica
LIV: Ibrahima Konate 21'; Roberto Firmino 55', 65'
BEN: Goncalo Ramos 32'; Roman Yaremchuk 73'; Darwin Nunez 82'
*Inkhel pahnih belhkhawmah 6-4 in Liverpool an chak
Inkhel chhehvel
• Liverpool leh City hi Wembley Stadium-ah vawi hnih an intawng tawh a, League Cup 2016 final leh Community Shield 2019-ah khan an intawng.
• Wembley-a an intawn pahnihah hian 1-1 in an inhnehtawk ve ve a, penalty hmangin City an chak ve ve.
• Tun season-ah Wembley-ah Reds-in nomawi an chawi der tawh a, Carabao Cup final-ah Chelsea chu goal khung loa an inhnehtawkpui hnuin penalty hmangin an hneh.