Spurs, United leh Arsenal tan chak hun

Kartawp Premier League inkhelah Manchester City leh Liverpool ten FA Cup semifinal an khelh dawn avangin champion inum hmuh tur a awm dawn lo a, Champions League inchuh thlir tur a awm thung ang.

Tottenham-in an match hnuhnung berah Aston Villa 4-0 in an sawp a, vawiin tlai dar 5:00 hian Brighton & Hove Albion an mikhual dawn. Antonio Conte chuan, "Champions League hi club, player leh manager zawng zawngin khelh an duh a ni. Kan khel phak a nih chuan nun phung a danglam ang," tiin a naute a fuih a, Seagulls lakah point hloh an tum lo ang.

Manchester United-in team talbuai Everton an hneh lo a, zanin dar 7:30 hian table mawngphaha awm Norwich City an mikhual dawn. Canaries hneh loh vangin Rafael Benitez (Everton), Watford (Claudio Ranieri) leh Burnley (Sean Dyche) ten an hna an chân a, manager nghet lo Ralf Rangnick pawh hi chân ve thei tho a ni.

Arsenal-in zanin dar 7:30 hian St Mary's Stadium-ah Southampton an tlawh dawn a, Saints hi tun hnaiah an chet ṭhat loh avangin Gunners dinhmun a ṭha. Southampton hian an match hnuhnung berah Chelsea 6-0 in an hneh lo a; Leeds United (1-1), Man City (4-1), Watford (2-1), Newcastle United (2-1) leh Aston Villa (4-0) lakah chak hmel hmu loin goal an chhuah nual.