Championship stage khel turin Aizawl FC an tling zo lo

I League khelh mekah Aizawl FC chuan April 14, Ningani khan Sreenidi Deccan 2-0 in an hneh lo a, championship stage an khel pha lo a, relegation stage an khelh a ṭul dawn. Sreenidi Deccan tan hian David Castaneda Munoz-a'n minute 83-naah goal hmahruai a khung a, injury time-ah Hriangtlang tlangval Vanlalbiaa Chhangte-in chak nemnghehna goal a khung.

Championship stage hi team pasarihin an khel dawn. Team paruk Mohammedan, Gokulam Kerala, RoundGlass Punjab, Sreenidhi Deccan, Churchill Brothers leh Neroca te an tling tawh. Hmun ruak pakhat hi Rajasthan United, Real Kashmir leh Trau ten an la hnawh khat thei ang.

Team pasarih te hi vawi khat ṭheuh an inkhel chhuak ang a, an point hmuh tawh sa nena belhkhawmin point hmu tam ber an champion dawn. Ningani zan khan Mohammedan SC-in Real Kashmir 3-1 in an hneh a, Kolkata club hi hmahruaitu ni mah se nizan inkhelah Gokulam Kerala-in Sudeva Delhi an hneh chuan table a danglam thei. Kashmir goal awmchhun hi Mizo defender Lalchhawnkima khung a ni a, amaherawhchu Chhawnkima hi injury time-ah hnawchhuah a ni.

Mizo club erawhin relegation stage an khelh a ṭul dawn. Championship stage khel pha lo team parukin relegation stage hi an khel dawn a, team pakhat an relegate ang.

Chutihrualin Indian rawlthar ṭha rual awmna Indian Arrows erawh an relegate ve thei lo. Table mawngphaha awm Kenkre-in point an hmuh tlem fal avangin Aizawl FC tan relegate erawh a hlauhthawnawm loh.