Arteta-a'n Auba chelh a duh

Arsenal manager Mikel Arteta chuan tun thlasik bazar lai hian player langsar leh hraw deuh tak an lak a beisei lo a, a striker neih ṭhat Pierre-Emerick Aubameyang chu chelh chhunzawm zel a duh thu a sawi bawk.

Spanish manager Arteta-a'n thla hmasa aṭang khan Gunners hi a enkawl ṭan a, match li an khelh tawhah vawi hnih chakin vawi khat an khingpuite nen an inhnehtawk bakah vawi khat chak loh an nei tawh. Player a nih laia Arsenal captain hlui Arteta chuan, "Kan team min ti chak thei tur player an awm a nih chuan kan thlithlai ang, transfer boruak lian erawh ka beisei lo. Player neih sa aṭang hian thil ṭha ka beisei zawk," tiin a sawi.

Nikum nipui bazar lai khan Arsenal hian Nicolas Pepe, Kieran Tierney, defender David Luiz, forward Gabriel Martinelli leh William Saliba te lakluh nan pound maktaduai 135 bawr vel an hmang a, defender Saliba erawh an inremna angin Saint-Etienne lamah loan hmangin a chhuak lehnghal. Tun dinhmunah hliam vangin Calum Chambers leh Tierney te an la chhawr thei lo a, tun bazar inhawn lai hian Emile Smith Rowe (kum 19), Eddie Nketiah (20) leh Tyreece John-Jules (18) te chu loan hmanga chhuak thei an nih thu a sawi bawk.

Arsenal striker leh captain ni bawk Aubame-yang chu tunah hian club ṭhenkhatin an ngaihven a, Gabon international hian North London-ah a hlim thu a sawi hnu lawkin Arteta a rawn ṭawng chhuak zui. Kum 37 mi Arteta chuan, "Auba hi kan hnena awm zel turin ka duh, ani a awm a nih chuan kan ṭhat zual sawt bakah chak thei tuin kan dinhmun a ṭha bawk," a ti. Auba hian seaon thar lo awm leh tur daih chiah hi contract a nei tawh a, tun dinhmunah chuan inbiakna an la nei rih lo.

Premier League table-a 10-na dinhmun luahtu Arsenal hian zanin dar 6:00 hian an chung chiaha awm Crystal Palace an tlawh dawn a, hnehna an chang a nih chuan Palace hi an kal kan thei ang.