Zverev leh Tsitsipas an tlang

Monte Carlo Masters khelh laiah champion tura rinkai zinga mi Alexander Zverev a chak a, champion lai Stefanos Tsitsipas pawhin harsatna lian tham tawk loin quarterfinal a invaw kai ve bawk.

Ningani zan inkhelah, seeded pathumna Zverev hian Pablo Carreno Busta chu 6-2, 7-5 in a hneh. Monaco-ah tun season atan clay court inelna a hmachhawn ṭan a, bul a ṭan fuh.

German tlangval Zverev chuan, "Set hnihnaah khan rilru pek loh zeuh lai ka nei, ka service hlohin 3-1 in ka hnufual hman. Mahse, theihtawp ka chhuah hnuah erawh ka insiamṭha thei, nomawi chawi tur chuan tun aia ṭha zawka khelh a ngai," a ti.

Zverev hian a match lehpekah chuan Jannik Sinner a hmachhawn ang. Inkhel dangah Sinner hian world number 8 Andrey Rublev 5-7, 6-1, 6-3 in a hneh a, set hnihna la tur hian a zawnin game ruk a la hial.

Champion lai Stefanos Tsitsipas chuan Laslo Djere 7-5, 7-6 (1) in a hneh. Greek tlangval hi a ranking a hniam deuh a, pangana ni mah se a khel a hmuhnawmna a bo chuang lo - Argentine player Diego Schwartzman nen an inhmachhawn leh ang.

Indian Wells champion Taylor Fritz pawhin quarterfinal a lut. Fritz hian doubles huanga a ṭanpui ṭhin Sebastian Korda chu 7-6 (4), 7-5 in a hneh. Grigor Dimitrov pawhin player ṭha Casper Ruud 6-3, 7-5 in a hneh ve bawk.

Fritz hian Alejandro Davidovich Fokina a tum leh dawn. Fokina hian a match hmasa berah Novak Djokovic a hneh a. Chumi hnuah David Goffin 6-4, 6-1 in a hneh leh thei a, mumang ramah a cheng mek.