Xavi enkawl Barcelona an tla

Barcelona chu Eintracht Frankfurt hneh loin Europa League quarterfinal aṭangin an tla. Xavi-a'n a enkawl hnuah Catalan club hian nasa takin hma sawn mah se, an tum ram thleng turin an la ṭha tawk lo; Eintracht Frankfurt lakah 4-3 in an tlawm.

Premier League club West Ham erawhin Lyon 3-0 in an luhchhuah a, inkhel hmasa zawkah 1-1 in inhnehtawk mah se pahnih belhkhawmah Hammers hi 4-1 in an tlang - David Moyes hnathawh a lo lang e!

Moyes-a naute hian semifinal-ah chuan Barca hnehtu Frankfurt an hmachhawn dawn a, semifinal lehlamah Rangers leh Atalanta hnehtu RB Leipzig an intum ve thung dawn a ni.

Mangṭha Barca
Eintracht Frankfurt muala an inkhelh ṭum khan Barcelona leh Bundesliga club hi 1-1 in an inhnehtawk. Barca fans lam inhnemna chu Nou Camp-ah kan la intawng leh dawn tih a ni a, an khelmuala inkhel tur an nih avangin a thlapang lem lo.

Mahse, Frankfurt an phur - German aṭangin fans 30,000 zet an zin lut a, chak an tum ngam. Minute lina lekah Filip Kostic-a'n penalty aṭangin a khung ṭan a, chawlhlawk hmain Rafael Borre chuan goal ropui a khung bawk.

Second half minute 67-naah Kostic bawkin goal an khung, anmahni mualah Barcelona chu 3-0 in an hniam! Hun tawp dawna ruaiah Sergio Busquets leh Memphis Depay hmangin chhanglet ve mah se an inchhanhim zo ta chuang lo.

Xavi-a nauten ball chang tamin inkhel thunun viau mah se, 1980 Europa League champion Frankfurt an inveng thei tlat a, counter attack hmanga an beih letna chu Barca hian an dawl lo zawk.

Buaina chu
Barcelona manager Xavi chuan Nou Camp chhungah an beisei anga player an chet loh thu a sawi a, chutihrualin fans lam pawh ni dang ang lo taka an thawm a nat tawk loh thu a sawi tel bawk.

Xavi chuan, "Chak loh hi a pawi, tournament aṭanga tlak phei chu pawi lehzual tak a ni. Tun ṭumah chuan Eintracht kha chak phu zawk an ni a, semifinal an luh avangin kan lawmpui mai tur a ni ang.

"Theihtawp kan chhuah, mahse kan buaina chu football a ni! Ball chang tamin inkhel thunun viau mah ila kan chhawr ṭangkai thei tlat si lo, tihsual kan ngah. Ball hloh leh tihsual vanga goal kan chhuah kha a pawi," a ti.

Barcelona hian indin thar leh an tum mek a, season kal laiah erawh La Liga lama Real Madrid hnaih thei ang bera awm chu an tih theih a ni tawh, champion beiseina awm tawh lo mah se pahnihna tal nih an tum ang.

Hammers an lo lang
West Ham-in European football-a semifinal an thlen hnuhnung hi a rei tawh hle, kum 46 zet liam tawh kha a ni. Khatih hunlaia piangte chu KṬP an over daih tawh tihna a ni a, senior tak an nih loh vek chuan fa an nei duah tawh ngei ang.

Tunah chuan David Moyes hun a inher chhuak. Season hmasa tir lam mai kha chuan Hammers hi Premier League aṭanga tlak hlauhawm team zinga mi an ni, tunah chuan mumang ramah an cheng mek.

Ligue 1 lakah Craig Dawson, Declan Rice leh season duhawm hmangtu Jarrod Bowen ten goal khat ṭheuh an khung a, mualneitu lamin a chhanletna tur an nei lo, khualmualah nuamsa takin English club an chak tiin a sawi theih.

Lyon hian Ligue 1-ah beisei an phak lo, mahse European football bikah erawh an match hnuhnung pakuaa tlawm nei lo chungin mikhual an thleng, tun ṭumah erawh a tir aṭangin West Ham an phak lo.

Beisei a sang
David Moyes chu a naute khelh danah a lawm hle a, semifinal mai ni loin final pawh luh theih a inbeisei a, champion hial tur pawhin theihna an nei tih a sawi tel bawk.

Hammers manager Moyes chuan, "Champion tura rinkai kan ni lo, amaherawhchu ka naute hian nomawi an chawi thei a ni tih hria se ka duh. First leg-ah player 10 a kan khelh a ngai a, chuti chung chuan kan tlawm lo.

"Khualmualah si thum faia chak turin khelh ṭhat a ngai, chutiang chu kan ti thei tlat si a ni. Tun season hnih chhung hian nomawi kan chawi lo a ni mai thei, kan hmasawnna erawh ropui ka ti hle," tiin a hnathawhah a lungawi.

Premier League table-ah pawh West Ham hi parukna an ni mek, point 51 hmuin an hnuaia awm Manchester United nen an point a inzat, season thar atan pawh European football an beisei leh ngam mek.

Europa League
Quarterfinal - First Leg
Eintracht Frankfurt 1 - 1 Baecelona
EIN: Ansgar Knauff 48'
BAR: Ferran Torres 66'
RB Leipzig 1 - 1 Atalanta
RBL: Davide Zappacosta 58' (OG)
ATA: Luis Fernando Muriel Fruto 17'
West Ham 1 - 1 Lyon
WHU: Jarrod Bowen 52'
LYO: Tanguay Ndombele 66;
Brago 1 - 0 Ramgers
BRA: Abel Ruiz 40'

Quarterfinal - Second Leg
Barcelona 2 - 3 Eintracht Frankfurt
BAR: Sergio Busquest 90+1'; Memphis Depay 90+11' (P)
EIN: Filip Kostic 4' (P), 67'; Rafael Santos Borre Maury 36'
(Aggregate-ah Eintracht Frankfurt hi 4-3 in an chak)
Rangers 3 - 1 Braga
RAN: James Tavernier 2' 44' (P); Kemar Roofe 101'
BRA: David Carmo 83'
(Aggregate-ah Rangers hi 3-2 in an chak)
Lyon 0 - 3 West Ham
WHU: Craig Dawson 38'; Declan Rice 44'; Jarrod Bowen 48'
(Aggregate-ah West Ham hi 4-1 in an chak)
Atalanta 0 - 2 RB Leipzig
RBL: Christopher Nkunku 18', 87' (P)
(Aggregate-ah RB Leipzog 3-1 in an chak)

Semifinal - First Leg
April 28, Ningani
West Ham vs Eintracht Frankfurt
RB Leipzig vs Rangers
Semifinal - Second Leg

May 5, Ningani
Rangers vs RB Leipzig
Eintracht Frankfurt vs West Ham