ECL semifinal khel tur Leicester
Leicester City chuan an club chanchina a vawi khat nan European football-ah semifinal an khel dawn a, European Conference League quarterfinal-ah 2-1 in PSV Eindhoven an hneh.
PSV tan Eran Zahavi chuan hma takah goal hmahruai khung mah se James Maddison leh Ricardo Pereira hmangin Foxes-in an chhanglet a, first leg-ah goal khung loa an lo inhnehtawk tawh avangin Premier League club hi 2-1 in an tlang.
Quarterfinal inkhel ngaihven hlawh dangah AS Roma chuan 4-0 in Bodø/Glimt an sawp a, inkhel hmasa nena belhkhawmin 5-2 in an tlang - Nicolò Zaniolo chuan hattrick a siam a, Tammy Abraham chuan goal khat a khung bawk.
ECL semifinal-ah Roma hi Leicester nen an intawng dawn a, hei hian ngaihven a hlawh ang - quarterfinal dangah Feyenoord-in 3-1 (Agg 6-4) in Slavia Prague an hneh a, Marseille chuan 1-0 (Agg 3-1) a PAOK Salonika hnehin Feyenoord leh Marseille hi semifinal lehlamah an intawng ang.
Comeback ropui
Foxes boss Brendan Rodgers-a'n a naute chu an club chanchina a vawi khat nana European football semifinal luhpui turin a fuih a, mahse, inkhel ṭan aṭanga minute 27-na lekah goal an chhuah nghal.
Youri Tielemans tihsual zarzoin PSV midfielder Mario Gotze chuan Zahavi tan a siamsak a, Israeli striker hian tun season-a a goal 17-na turin a lo khung a, English club hrilh a hai - goal dang lut loin chawlhlawk an hmang.
First leg-a goal khung thei lo Foxes hi an tlak mai rinna a lian hman hle. Mahse, Rodgers-a'n second half-ah winger Ademola Lookman, Patson Daka leh Ayoze Perez a luhtir a, an goal nawr a na sawt.
Minute 77-naah Perez-a'n fing taka a siamsak chu Maddison chuan goal-ah a chantir a, Lookman-a siamsak, Daka-a pet chu dan per ni mah se a per lehlam hi Pereira chuan goal-ah a chantir ve leh a, 2-1 in Foxes an chak.
A tawpah Roma
ECL-a thawm nei na ber pawl chu Roma vs Bodo/Glimt a ni - group stage-a an intawn hmasak berah Bodo/Glimt hi 6-1 in an chak a, Roma khelmualah 2-2 in an inhnehtawk a, quarterfinal first leg-ah 2-1in Norwegian club bawk an chak.
First leg-a team pahnih intawn hmasakah boruak a 'hot' a, inkhelh zawhah buaina a chhuak hial a, Bodo coach Kjetil Knutsen leh Roma goalkeeping trainer Nuno Santos te chu hrem an ni hial.
Mourinho-a'n inkhelh hma hauin ṭawngkam feiki bar a hmang a, khelmualah ro an rel ta bawk - Roma tan kum 22 mi Zaniolo chuan hattrick a siam a, Italy international-in a goal thumna a khung hian minute 49 chauh a la ni a, goal dang erawh a lut tawh lo.
Italian club tan hian Tammy Abraham chuan minute ngana lekah goal hmahruai a khung bawk a, English striker tan tun season inelna hrang hranga goal 24 a khungna chiah a ni a, inkhel hmasa nena belhkhawmin 5-2 in semifinal an lut.
ECL Quarterfinal - First Leg
April 7, Ningani Zan
Feyenoord 3 - 3 Slavia Prague
FEY: Luis Sinisterra 10'; Marcos Senesi 74'; Orkun Kökçü 86'
SLA: Peter Olayinka 41'; Yira Sor 67'; Ibrahima Traoré 90+5'
Bodø/Glimt 2 - 1 AS Roma
BOD: Ulrik Saltnes 56'; Hugo Vetlesen 89'
ASR: Lorenzo Pellegrini 43'
Marseille 2 - 1 PAOK
MAR: Gerson 13', 90+4'; Dimitri Payet 45'
PAO: Omar El Kaddouri 48'
Leicester City 0 - 0 PSV Eindhoven
Quarterfinal - Second Leg
April 14, Ningani Zan
PSV Eindhoven 1 - 2 Leicester City
PSV: Eran Zahavi 27'
LEI: James Maddison 77'; Ricardo Pereira 88'
*Agg-ah Foxes 2-1 in an chak
AS Roma 4 - 0 Bodø / Glimt
ASR: Nicolò Zaniolo 23', 29', 49'; Tammy Abraham 5'
*Agg-ah Roma 5-2 in an chak
Slavia Prague 1 - 3 Feyenoord
SLA: Ibrahim Traoré 14'
FEY: Cyriel Dessers 2', 59'; Luis Sinisterra 78'
*Agg-ah Feyenoord 6-4 in an chak
PAOK 0 - 1 Marseille
MAR: Dimitri Payet 34'
*Agg-ah Marseille 3-1 in an chak