Curry dinhmun a la chiang lo

NBA regular season an khel zo a, tunah chuan conference pahniha a thiam zual pariat ve ve ten playoff an khel dawn. Golden State Warriors thiampuipa Stephen Curry chu a dinhmun a la chiang lo.

Golden State hian Pathianni zing dar 6:00-ah Denver Nuggets an hmachhawn dawn, tun dinhmunah GSW thiampuipa Curry hi a ke vei lam hliam vangin a chawl mek, mimal training erawh a nei thei tawh.

Warriors coach Steve Kerr chuan, "Amahin training a la nei, zawi muang chuan hma a sawn. Inrinni hian a dinhmun endik leh a ni ang. Kan ruahmannah chuan Steph hi a tel zel a, a lo kir hun kan nghakhlel takzet," a ti.

March 16 khan Boston Celtis nen an inkhelh ṭumin Curry hi a inhliam, a awm loh hlanin match 12 an khelhah vawi ruk an chak a, an chak loh zat chiah an tlawm bawk - Curry tel lo chuan ngai an awh thei lo.

Kerr chuan sawi zawmin, "Steph a inlan thei lo a nih pawhin player dangin mawhphurhna an lak a ngai. Inkhel turin an taksa leh rilru inpeih vek se ka duh, hun kan ngah tawk loh avangin player zawng zawng inkhel theia an awm a ngai," a ti.

Regular season-ah khan Warriors hi vawi 53 an chak a, ṭum 29 an tlawm thung. Western Conference-ah pathumna an ni, conference champion nih pawh thil awlsam a ni dawn lo.

Eastern leh Western Conference ten conference champion an zawng dawn a, chumi hnuah a champion pahnih ten NBA Finals an khel ang.

NBA Playoff - Game 1 Fixtures
April 16, Zirtawpni
Cleveland cavaliers 05:00 AM Atlanta Hawks
Los Angeles Clippers 07:30 AM New Orleans Pelicans
Dallas Mvericks 10:30 PM Utah Jazz
April 17, Pathianni
Memphis Grizzlies 01:00 AM Minnesota Timberwolves
Philadelphia 76ers 03:30 AM Toronto Raptors
Golden State Warriors 06:00 AM Denver Nuggets
April 18, Thawhṭanni
Boston Celtics 01:00 AM Brooklyn Nets
Milwaukee Bucks 04:00 AM Chivago Bulls